Kisah Kawat Nyamuk

palui-35Wayah ini hari bilang kada kawa ditangguh. Kalihatannya tarang banar, sakalinya hujan. Bisa jua mulai baisukan kadap sakalinya kada hutan. Tapi ada nang rancak diyakini urang mulai bahari, sampai wayah ini. Yaitu bila hujan bamula hari jumahat biasanya bamingguan hanyar ampih.

Nang dihawatirakan bila hujan tatarusan maka cagar babanyuan susungaian wan got kiri-kanan rumah. Bila banyunya tagana pasti cagar banyak nyamuknya. Maka nyamuk wayahini babahaya banar karna bisa manyababakan panyakit damam badarah.

“Di rumahku Bus ai, biarpun musim babanyu dan musim banyamuk aku kada hawatir jua karna di rumahku hanya ada saikung haja nyamuknya,” ujar Palui.

“Palui pangaramput, Palui pandusta. Samalam aku bailang ka rumah ikam nyatanya nyamuknya kada katapakan,” ujar Tulamak.

“Nyamuk nang banyak itu karna umpat lalu dan umpat bailang wan nyamuk nang ada di rumahku itu,” ujar Palui.

“Lalu kaya apa caranya supaya kita kada diigut nyamuk, karna saban malam aku kanyamukan tarus dan kada kaubat-nyamukan, samalaman habis sa kutak ubat nyamuknya,” ujar Garbus wan Tulamak.

“Aku kada kanyamukan karna kutukarakan kawat nyamuk. Kalu ikam handak mancuba, banyak urang bajual di pasar,” ujar Palui.

Isuknya Garbus wan Tulamak tulakan ka pasar mancari kawat nyamuk tapi sampai uyuh bakuliling pasar kada tatamu jua urang bajualan kawat nyamuk.

“Ikam pangaramput Lui ai, tuhuk kami mancari kawat nyamuk kadada urang bajualan. Nang ada hanya kawat haruan, kawat papuyu, kawat tauman dan kawat baung,” ujar Garbus mangaramputakan.

“Dimana ikam mancari dan di tuku mana ikam batakun handak manukar kawat nyamuk?” ujar Palui.

“Kami batakun di tuku urang bajualan unjun, bajualan lunta,” ujar Tulamak.

“Ikam badua sama buntatnya. Kawat nyamuk kada baarti kita maunjuni nyamuk kaya maunjun iwak, tapi manukar kawat nyamuk itu di tuku bangunan,” ujar Palui maniwas kawalnya nang pina pintar-pintar bungul itu.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.