Kisah Makna Parjuangan

palui-51Mamparingati wan marayakan hari kamardikaan, biasanya rami banar. Macam-macam karasminan diadaakan, diantaranya lomba naik pinang bahadiah.

Bubuhan Palui basamangat banar umpat balumba.

Tulamak nang awaknya ganal, wayah malihat macam-macam hadiah bagantungan di atas, inya kada pikir panjang lagi, capat macul baju, langsung maragap puhun pinang nang licin itu.

Bapuluh kali Tulamak bakayakat, tapi taundur tarus ka bawah. Inya balum putus asa. Maju tarus pantang mundur waja sampai kaputing ujarnya. Inya yakin pasti sampai ka atas.

Tapi ada urang nang dibawah manarik batisnya. Ada nang manjajak dibahu, di pinggang, dipunggung. Malahan ada nang manjajak di kapala, dimuha sahingga muhanya bacalumut wan licak.

“Ikam ni kurang ajaaar!” ujar Tulamak bakuciak manyumpah tapi sumpah-pisuhnya itu kada didangar urang nang gagap gampita.

Urang banyak basurak karana sudah ada nang sampai di atas, langsung mamutiki barang-barang hadiah disitu. Ada baju kaus, sapatu, sandal gapit, payung, mainan kakanakan sagala macam. Nangkaya dijilat naga hadiah-hadiah itu habis.

Awak Tulamak nang gambrut itu maluncur ka bawah bakuang licak. Inya parak kahabisan hinak. Anak bininya takuciak, mati abahku….tulungi abahku, ujar anaknya manangis.

Palui, Garbus wan Tuhirang lakas turun tangan, mambawakan tapih baju, handuk wan butul minuman. Urang-urang kada paduli lagi wan Tulamak nang tabantai. Bubuhannya itu tatap basurak lalu manyaksikan pula ka puhun pinang lainnya.

Malamnya Palui wan Garbus mailangi karumah Tulamak nang garing.

“Itu lah cuntuhnya kajadian tadi siang itu manggambarakan bahwa makna parjuangan wayah ini sudah baubah, sudah kada sama lagi,” ujar Palui imbah malihati kaadaan Tulamak. “Napanya nang barubah Lui?” ujar Garbus kada paham.

“Ibaratnya parjuangan timpu dulu, banyak pandaritaan tapi samunyaan gasan satu tujuan yaitu mardika. Tapi parjuangan wayah ini adalah gasan mancapai pangkat, kadudukan wan kakuasaan. Sikut sana, gipak sini. Kawankah, sahabatkah, kalau parlu dijajak, dilincai biar mampus, asal dirinya atawa kalumpuknya naik sampai ka puncak. Nang manonton jua lupa diri bakuciak mambari sumangat, asal manang!” ujar Palui garigitan.

Bujur Lui ai! ujar Garbus umpat bapandir. “Nang manang manggundul hadiah, nang kalah parak mampus. Nang basurak umpat mamuji manyanjung. Kapada pamanangnya. Kalu dahulunya manyanjung Tulamak, tapi Tulamak gugur tahantak, maka kawan-kawan pun kulir baparak”.

Tuhirang umpat jua manggarunum. Mun sudah jadi juara lumba, maka barabutan buhan kamira ma abadikan ka kuran atawa ka tivi. Sabaliknya nang kalah ma-urut dada, nang kaya hukum rimba, siapa kuat dialah raja.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.