Kisah Pintar Bajualan

palui-40Salawas umpat umrah tadi handak tiap hari Palui manalipun ka banua mahabari kaluarganya bahwa inya dalam kadaan sihat salamatan haja. Disamping itu Palui pun handak tahu jua habar banua.

“Kami salamatan, sihat walafiat haja. Walaupun dalam barapa hari ini udara disini dingin banar. Mudahan ikam sapakawanan kaya itu jua,” ujar Palui wayah manalipun Garbus.

“Ikam ini manalipun mulai matan dimana Lui, di Madinah-kah atawa di Makkah-kah,” ujar Garbus manyahut di talipun.

“Aku manilpun mulai matan Makkah,” sahut Palui.

“Kaya apa anakku nang kuminta awasiakan Bus?” ujar Palui.

“Wayahini inya pintar banar bausaha, pintar bacari, panduitan banar,” ujar Garbus.

“Tarima kasih atas bimbingan ikam Bus lah. Napa usahanya Bus?” ujar Palui handak tahu.

“Anak ikam pintar banar bajujualan” ujar Garbus.

“Mungkin ini barkat doaku di Makkah dikabulakan Tuhan,” ujar Palui pina himung mandangar anak pintar bajujualan.

“Kaina imbah ikam bulik ka banua malihat haja gawiannya, jualannya payu banar,” ujar Garbus.

“Aku handak tahu wayahini jua Bus ai karna aku marasa himung banar mandangar habar ikam ini,” ujar Palui.

“Tapi bila kusambat ikam jangan takajut karna jualannya barang-barang ganal,” ujar Garbus.

“Alhamdulillah, aku bahasil mandidik anak jadi pangusaha,” ujar Palui.

“Makanya tadi kusambat ikam jangan takajut,” ujar Garbus.

“Takajut napa Bus?” ujar Palui banyaring.

“Anak ikam pintar banar bajujualan, rumah, tuku wan kius tamasuk sapida muutur ikam sudah payu dijualnya,” ujar Garbus batarus tarang.

“Masya Allah…………” ujar Palui hinip kada saling suaraan lagi di dalam talipun.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.