Kisah Pucuk Gumbili

palui-55Wayah kadada gawian lain lagi, Palui tapaksa jadi supir taksi padesaan jurusan Gambut – Pasar hanyar. Dibawainya jua si garbus nang kabujuran lawas kada sing gawian jua gasan umpat mangarnitakan.

Wayah tulak matan Gambut tadi, cuma saikung panumpangnya, bibinian pina lamak mungkal, bagincu habang, bagalung tinggi dan babaju kabaya putungan kutabaru nang kalihatan sadikit sasala gugunungannya. Palui pina makin rancak manyirit kahiga pura-pura maitihi kaca pion, lalu lihum saurangan.

“Ayu Bus bakuriak cari panumpang,” ujar Palui manyuruh Garbus nang duduk di bangku balakang.

“Kertak Hanyar, Kertak Hanyar … Banjar, Banjar,” ujar Garbus kukuriak bahanu sambil takulibi malihat Palui pina asyik banar manyupir mamanderi panumpang bibinian dihiganya itu.

“Aku turun satumat di Kartak Hanyar,” ujar bibinian itu.

Imbah turun matan mutur lalu manyubarang jambatan pasar, tarus kalihatan masuk ka dalam pasar. Palui wan Garbus, lawas banar mahadangi tapi kada cangul-cangul jua.

“Kita dikaramputi dan ditipunya Bus ai, lawas mahadangi dan ungkus mutur kada dibayarinya,” ujar Palui pina manyasal.

“Kada usah manyasal Lui ai dan kada usah marasa rugi karna ikam sudah tuhuk haja manyirit dan manjapai tangannya,” sahut Garbus pina hiri. Sual ungkusnya kada usah hawatir karna ini ada dua bungkusan barangnya nang ditinggal di mutur. Kita anggaplah barang ini pangganti ungkus taksinya,” ujar Garbus.

“Ayu ja Bus ai ada gagantiannya, cuba buka napa isinya, mungkin baju salawar,” ujar Palui manyuruh.

Lalu Garbus lakas mambuka bungkusan itu, pina barat dan pina karesekan bunyinya. “Eee, sakalinya isinya pucuk daun gumbili wan kalaras karing,” ujar Garbus pina kaciwa.

“Bangsat banar bibinian itu, dianggapnya kita ini kambing tuha nang katuju mamakan daun-daun anum,” ujar Palui umpat sarik sambil gagarunum manyumpah.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.