Kisah Tasusulait

palui-57Masuk bulan puasa Palui pina ubah kalakuan. Palui wayahini rajin sambahyang. Kada kaya bahari nang balang kambingan. Baik haja amun babalang, nang kada baik balangnya kadada lalu alias parai. Takananya inya jua katuju mandangar urang babacaan di langgar. Tabarungan subuh itu guru Jain bacaramah kauntungan sambahyang bajamaah itu 27 kali pahalanya dari pada sambahyang saurangan.

Di rumah Palui bapadahan lawan nang bini wan anaknya sasuai papadahan guru di langgar tadi. “Jadi umanya ai, kita tu baik banar amun kawa sambahyang baimbaian, ganal jua pahalanya. Salajur malajari anak kita sambahyang,” ujar Palui mamadahi bininya.

“Ulun matan bahari ai handak kaya itu, pian haja pina jungkang ruat surangan amun sambahyang,” ujar nang bini. Lalu ai Palui rajin mambawai bini wan anaknya sambahyang bajamaah di rumah. Tamasuk jua sambahyang tarawih.

Pas malam itu rahatan handak tarawih Palui wan nang bini, anaknya si utuh halus basiap-siap handak sambahyang. Sakalinya tadangar utuh halus bagarunum. “Pasti mambaca alfatihah, limbah itu kul ya lawan kul huallah, kaya samalam-samalam jua,” ujar nang anak gagarunum. Rupanya inya mahatiakan jua bacaan nang kuitan si Palui taulang nangitu-ngitu tarus.

“Hau, kanapa jadi ikam bapander kaya itu?” ujar Palui sadar disindir.

“Ha… ha… pian katahuan anak, bacaannya kadada nang lain, iya fatihah, kul ya lawan kul huallah, bacaan nang lain kada suah,” ujar nang bini umpat manawaakan.

“Dangarakan nah bacaanku imbah ini,” ujar Palui pina sarik disindir. Pas rahatan rakaat partama, Palui banyaring mambaca Al-fatihah. Limbah inya manyambung ka surah An-Naas.

“Qul a’uuzubirabbinnas, Maa-likiyau middin, Iyyakana buduaa iyyaa kanastainn,” ujar Palui mangancang.“Bah… bah pian salah, pian salah,” ujar nang anak mamukul ka abahnya nang jadi imam.

Palui takajut dipukul matan balakang, paksa Palui wan nang bininya babatal sambahyang. ”Napanya nang salah nak, bujur haja bacaan abah tadi,” ujar Palui mangaras.

“Pian mandangarlah ma bacaan abah tadi. limbah Qul’auuzubirabbinannas lalu ma-likiyaumiddiin? Kanapa taka fatihah lagi? ujar nang anak kakalakak manawaakan.

“Amun dasar kada hapal, kada usah baganti bacaan abahnya ai. Nang hapal haja dahulu, daripada tasusulait lagi,” ujar nang bini umpat jua mahaapak.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.