Kisah Padih

palui-68Palui dasar kada tapi pamuasa, hanyar pukul sapuluh sudah kipuh inya kahausan wan kalaparan lalu lakas tu inya tulak bacari warung sakadup. Padahal wayah sabalum puasa inya sudah baniat handak puasa tunai sabulanan.

“Aku kada puasa hari ini karna aku kada sawat basahur, makanya aku tapaksa banar mailangi aci Irus,” ujar Palui kasupanan wayah katahuan Garbus hanyar kaluar matan warung sakadup.

“Kada usah baalasan macam-macam Lui ai. Sahur itu cuma sunat haja, apabila kita kada sawat basahur, maka kita bulih haja puasa salajur,” ujar Garbus.

“Kahandakku tadi nangkaya itu jua bus ai, handak puasa salajur jua. Tapi aku ini ada baisian panyakit mah, nang kalu parut kalawasan puang bisa bakumat pulang,” ujar Palui baulah alasan.

“Tapi kanapa kulihat pina masih bapicik kaparut padahal ikam hanyar kaluar matan warung sakadup,” ujar Garbus.

“Parutku rasa padih banar,” ujar Palui.

“Kalu hanyar haja mahantup sapiring jubung kanapa maka bapadah parut padih,” ujar Garbus.

“Parutku padih banar Bus ai makanya aku rancak bapicik dan manggaru parut,” ujar Palui.

“Kalu hanyar haja diisi kada mungkin parut ikam padih dan mahahing bagaru kahulu kahilir,” ujar Garbus kada parcaya.

“Parutku padih ini kada karna lapar atawa panyakit mah Bus ai, tapi karna……….,” ujar Palui.

“Padih karna apa?” ujar Garbus.

“Padih karna wayah makan tadi aku kapadasan tamakan sambal lombok perawit, sampai malihir paluhku,” ujar Palui.

“Biarpun tamakan sambal kada mungkin sampai padih banar dan bahimat bagaru sa-awakan,” ujar Garbus.

“Aku kapadihan ini rupanya paluh awakku tadi mambasahi kurap nang ada di parut wan di pinggangku,” ujar Palui mangaku sambil pina supan.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.