Kisah Ubat Huban

palui-87Amun Palui suah ka Jawa maka Garbus, Tuhirang, lawan Tulamak paling-paling suah ka kuta kabupatin haja. Hanyar-hanyar tadi, Palui handak marasaiakan kakawalannya tulakan ka mal nang ada di Banjar.

“Bajalan jangan papalingau, jangan bajurut, kaina dipadahakan urang bukit. Kita pacang malihat tuku ganal, tuku urang sugih, kadada panjaga bisa maambil saurang, haraganya pas, kada bulih batatawaran. Disitu samunyaan ada, ada jua biuskupnya, ada wadah mainan kakanakan, main biliar, main dingdung.” ujar Palui imbah sampai di ka wadah nang disambatnya mal tadi.

“Bubuhan ikam jangan pina gugup masuk ka situ, tangganya bajalan saurangan, umpati haja aku supaya jangan tapulanting, kaina ditawaakan kakanakan.”

Imbah bakuliling, puas balilihat, Palui mambawai kakawalannya makanan ka warung Ciken. “Aku minta nasi putih haja jangan kantang basanga, iwaknya papuyu baubar.” Ujar Garbus.

“Kaya itu jua aku, iwak pais patin wan gangan asam haja.” Ujar Tuhirang.

Tulamak badiam haja, mairingi ujar Palui, liurku saraba cucuk ujarnya.     “Maka matan tadi sudah aku padahi jangan minta macam-macam umpati aku haja, inya warung ngini warung urang luar nagari, babayar badahulu hanyar makan, lain kaya di banua kita, itu artinya urang kada parcaya lawan kita, takutan kalu di tinggalakan bukah imbah tuntung makan.” Ujar Palui.

Imbah itu macam-macam pulang sambatan buhannya. Hayam bagalapung di padahakan gaguduh, banyu bauap di padahakan maigut muntung, nasi batakar di padahakan pamalar, nang bulih maambil banyak tumat lawan sambalnya haja.

Imbah tuntung makanan bubuhannya abut pulang kadada pambasuhan tangan, padahal mulai makanan tadi sudah kada babasuh jua, sakalinya Palui kada ingat mamadahakan andakan pambasuhan tangan.

“Dasar pamalar banar, pakacauan haja kadada.” Ujar Garbus manggarunum.

“Pakai haja ilmu urang bahari.” Ujar Tuhirang. Tangan bakas makan sapuakan ka kapala, ka rambut sampai lingis barasih, tangan bakas makan, bakas iwak ada apuahnya, ubat rambut supaya jangan bahuban, supaya tatap hirang.

Mandangar ada apuah ubat huban, taimbai bubuhannya manyapuakan tangan ka kapala. Palui nang hanyar datang matan babasuh tangan tanganga malihat kalakuan kakawalannya nitu

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.