Kisah Jambatan Balum Tuntung

Imbah batahun-tahun manabung, akhirnya Palui kawa jua manukar sapida mutur. Lantaran lawas bajuang supaya kawa manukar nang kaya urang jua, Palui sayang banar lawan sapida muturnya itu.

Saban imbah mamakai kandaraan hanyar tadi, pasti dibarasihinya. Padahal, sapida muturnya itu kada rigat, hanya dabu nang palingan saculit. Maka, mambarisihinya lawan anduk hagin mandi.

Kada hanya itu, sapida muturnya itu, bila malam handak guringan diandak di kamar kaguringan. Di sabalah kiri ranjang, sabalah kanannya sapida mutur. Saking kasayangannya lawan sapida muturnya itu, malam handak guring pasti ditukupinya lawan kain. “Amun kaguguran tahi cacak, rigat kaina,” ujar Palui.

Tapi, wayah ini Palui pusang banar lantaran kada kawa bajalanan jauh hagan marayun sapida mutur hanyarnya. Karna jambatan di kampungnya nang mahubungakan lawan kampung sabalahnya dibaiki. Padahal di sana ada bakas pacarnya bahari sabalum kawin lawan Zaleha bininya wayah ini. Maksudnya, inya handak mamadahakan bakas pacarnya bahari nang wahini balu pada inya baisian sapida mutur.

Akibatnya, inya basapida mutur kulilik-kulilik di parak-parak rumahnya haja. “Jambatan itu, ujar habar tuntung bulan dahulu,” ujar Palui mamandiri Tulamak.

“Hi-ih, aku gin madangar nang kaya itu. Tapi, kanapa yu sampai bulan ini, balum tuntung jua. Pina nang kaya itu ha,” ujar Tulamak manyahuti.

“Ujar habar, pambangunannya rancak takalang hujan wan banjir samalam,” ujar Tuhirang umpat bapandir. “Bah, itu alasan nang maulah haja kalu. Kada mungkin, bubuhannya kadada baisi rancana cadangan bila tajadi hal nang kaya itu,” ujar Palui menyahuti. “Baarti nang ampun gawian kada profesional,” ujar Palui manambahi.

“Aku tahuai kanapa ikam sarik banar jambatan itu kada tuntung-tuntung, karna ikam kada kawa bakoyo lawan si Ijum, balu bakas pacar ikam bahari,” ujar Tuhirang manangguh.

“Hati-hati Lui ai, mun katahuan bini ikam, ikam handak maagaki Ijum, sapida mutur ikam itu bisa dijualnya,” ujar Tulamak manambahi.

“Bubuhan ikam ini pandiran jauh banar baliuk. Urang mamandirakan pambangunan jambatan nang kada sasuai targit, bapindah ka kisah si Ijum,” ujar Palui sarik. “Ijum tu bahari banar, sudah kada kuingatakan lagi. Aku handak manampaiakan banaram, supaya inya manyasal manulak kawin lawan aku,” ujar Palui pulang.

“Tapi sayang banar Lui ai. Imbah inya jadi balu, urangnya pina batambah langkar,” ujar Tulamak mahuluti.

“Munyak banar bubuhan ikam ini, kada kawa sahari kada mahapaki kawan,” ujar Palui sambil bajauh manggas sapida muturnya.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.