Kisah Umpat Ma-andak

Imbah takana PHK karna pabrik wadahnya bagawi tapaksa tutup, Palui tuhuk mancari gawian kada dapat jua. Akhirnya Palui laki bini bulikan ka banua. Di samping babulik manggawi pahumaan inya maulah warung teh di halaman rumah.

“Cucuk ujar paribahasa urang tuha-tuha bahari, satinggi-tingginya bangau tarabang ahirnya bulik ka kampung jua,” ujar Garbus.

“Syukur jua di banua kawa haja mambuka warung nginuman ini dan banyak haja nang manukarinya,” ujar Palui.

“Apalagi bini ikam pintar baulah wadai, ramahan wan tamu jadi banyak urang katuju,” sahut Garbus.

“Bujur Bus ai, wayahini banyak urang mambuka warung atawa restoran tapi kada lawas lalu tutup atawa ampihan, hanya gara-gara layanannya,” ujar Palui.

“Layanan kaya apa Lui?” ujar Garbus.

“Banyak nang layanannya pina makin kada nyaman, bahanu pina kada supan bahkan pina purici,” ujar Palui.

“Uiii…. Palui,” ujar Tulamak nang hanyar datang. “Warung ikam payu banar, bulihlah aku umpat ma-andak wadai,” ujar Tulamak babisik.

“Ayu haja silakan, wadai napa nang diandak,” ujar Palui.

“Ini nah biniku baulah wadai pais wan ruti pisang,” ujar Tulamak sambil ma-andak piring talamnya lalu inya bulik.

Kamariannya Palui sudah basisimpun handak tutup. Rupanya hari pina maram banar parak hujan maka lakas-lakas ditutupnya warungnya supaya kada katampiasan, datang Tulamak handak ma-ambil duit haraga wadai andakannya.

“Kaya apa wadaiku Lui, nyaman juakah?” ujar Tulamak.

“Ini nah wadai ikam tadi,” ujar Palui sambil mambulikakan piring talamnya.

“Kanapa maka pina hibak haja, kada payukah Lui. Apakah kadada nang manukarinya?” ujar Tulamak batakun.

“Tadi banyak haja nang batakun wadai siapa, kupadahakan wadai bini ikam,” ujar Palui.

“Kanapa maka inya kada manukari,” ujar Tulamak.

“Aku kada wani manjualakan karna ikam tadi hanya bapadah umpat ma-andak haja, padahal bubuhannya handak banar marasani wadai ulahan bini ikam,” sahut Palui.

“Oooo……… nangkaya itu kah. Jadi kada payu sabuting-butingkah Lui?” ujar Tulamak pina sarik.

“Salah ikam jua Mak ai karna tadi ikam hanya baucap umpat ma-andak haja sama sakali kadada bapasan supaya minta jualakan. Makanya aku kada wani manjualakan takutan tasalah dan kana tumpalak,” ujar Palui bujur harus manjawab.

One Response to Kisah Umpat Ma-andak

  1. Arifsp says:

    Unda urang banjar jua…..rme ksh’na ….

    D’kira palui nang t’slah pdahal tulamak nang tasalah.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.