Kisah Makan Gaji Buta

“Nyamanlah Lui ikam jadi pagawai,” ujar Garbus batakun.

“Sanyanyamannya disuruh urang tapaksa jua Bus ai,” sahut Palui pina hambar.

“Kanapa maka kaya itu jawaban ikam Lui?” ujar Garbus.

“Nang nyaman itu kada jadi pagawai honor kaya aku ini Bus ai, tapi jadi kapala atawa jadi pimpro atawa jadi bandahara, pukuknya nang ada kaitannya wan uncui,” ujar Palui.

“Kada usah bakaramput Lui ai, biarpun ikam bapadah sakit sapuluh kali sakit jadi pagawai tapi nyatanya saban tahun urang barabut malamar handak jadi pagawai. Kada cuma itu Lui, bahkan bubuhan nang tuha-tuha kita bila handak baminantu pasti katuju pagawai,” ujar Tulamak.

“Urang katuju jadi pagawai itu karna saban bulan sudah ada kapastian tarima gaji,” ujar Garbus.

“Sahibar gaji kada cukup jua, cuma tahan satangah bulan haja lalu satangah bulannya lagi, tapaksa bahutang atawa baarit liur. Karna kada bakacukupan itu maka ada-ada haja akal pagawai, biasa maujek, bisa mambalantik, mangariditakan barang dan ada jua nang babisa-bisa maakali duit kantur atawa sintak sana sintak sini alias pungli alias korup.” ujar Palui.

“Pagawainya banyak tapi banyak nang kada kabagian gawian lalu manganggur, baca koran, main catur atawa ada jua nang kaluyuran di pasar,” ujar Tulamak.

“Kalu sual pagawai manganggur itu sudah kada rahasia lagi Mak ai. Saban hari masih banyak haja pagawai nang kaluyuran kasana kamari, padahal hari Sabtu sudah diparaiakan,” ujar Garbus.

“Kalu sampai ada pagawai nang kaluyuran itu kada salah pagawainya Bus ai, tapi salah kapalanya karna kapalanya katuju jua kaluyuran. Bahkan kaluyurannya kada cuma dikutanya haja tapi sampai kaluyuran ka Jawa-Jawa sana,” ujar Palui umpat pina sarik.

“Aku akur banar adanya anjuran supaya pagawai nang baumur 50 tahun dilakasi haja pansiun atawa disaleksi pagawai nang pangulir, nang asbun, nang makan gaji buta,” ujar Tulamak.

“Bujur ujar ikam itu Mak ai, wayahini banyak pagawai nang makan gaji buta,” ujar Garbus.

“Napa arti gaji buta itu Mak? Aku hanyar mandangar istilah ikam itu. Karna biasanya nang dipadahakan buta alias picak alias kada malihat itu adalah manusia. Karna satiap nang picak kada malihat maka jadi KKN alias kiri kanan dituntun,” ujar Palui.

“Ikam Lui ai tamasuk makan gaji buta jua karna balum pukul dua belas sudah mancungkung di warung,” ujar Tulamak manyindir.

“Saban hari aku mancungkung di warung ini karna mahadang dauh babunyi wayah sambahyang zuhur,” ujar Palui marasa manang kawa baulah alasan.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.