Kisah Wadai Untuk Masam

Sudah kabiasaan Palui wan kakawalan bila malam imbah sambahyangan tarawih sampai mamukul sawalas masih garunuman bapapanderan di gardu atawa di warung.

Kaya itu jua malam tadi, itupun kada tarus bulikan ka rumah tapi manyimpang minum teh, sambil bapapanderan wan bahahapakan sampai parak tangah malam hanyar bulikan. Tatinggal Palui wan nang ampun warung sambil bapapanderan kahulu kahilir.

Sambil badiri handak bulik, Palui mahabisakan sisa kupinya lalu manakunakan barapa haraga nginumannya.

“Sampiyan nginum kupi lalu makan wadai napa?” ujar tukang warung.

“Kupi tadi aku mamasan satangah cangkir haja, lalu makan nasi pundut sabungkus,” ujar Palui.

“Wadainya pang nang mana?” ujar pakacil Isul.

“Itu nah……katapi sabigi,” ujar Palui.

“Kadada katapi, kami kadada bajualan kjatapi,” ujar bini Pakacil Isul.

“Itu nah……” ujar Palui sambil manunjuk.

“Oooo…….itu lain katapi, itu wadai untuk, wadai untuk-untuk, sahut pakacil Isul. Kanapa maka ikam padahakan hambawang,” ujarnya batakun.

“Tapaksa ai kusambat katapi karna masamnya wan karas-karasnya sama banar lawan katapi. Padahal samalam, aku makan wadai untuk itu jua di warung ini rasanya manis banar,” ujar Palui.

“Kalu kaya itu bujur haja masam Lui ai, karna wadai untuk nang kujual itu dasar untuk samalam jua,” ujar nang bini.

“Barapa samunyaan haraganya?” ujar Palui.

“Kupi wan nasi pundut, lima ratus haja Lui ai,” ujarnya

“Lalu barapa haraga katapi tadi?” ujar Palui bagaya.

“Untuk-untuk katapi itu gasan ikam parai haja, karna labihannya handak kubari makanakan ka kucing,” ujar tukang warung mambalas sindiran Palui.

Imbah mambayar, Palui baingsut bulik kada saling padahan, handak mangalahakan tukang warung tapi langsung diangsul urang, lik satu satu, ujarnya dalam hati.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.