Kisah Takait Utas

Wayah ini Palui rajin banar tulak ka pangajian, malam Kamis, malam Jumahat, wan malam Sabtu. Di mana haja ada urang babacaan, pasti didatanginya. Pukuknya handak saban malam Palui kada parnah ada di rumah.

Nangkaya biasanya kamarian itu, imbah bulik matan ba-ashar di langgar Palui langsung manggusuk baju wan tapih nang cagaran dipakainya tulak babacaan. Imbah tuntung bagusuk baju lalu inya tulak mandi. Kada lawas mandi, bahancap inya bapakaian.

“Ui abahnya.. Handak kamana pulang sampiyan bilang saban malam kadada di rumah?” ujar bininya manakuni.

“Biasa umanya ai, urusan ahirat,” ujar Palui manyahuti.

“Bujur haja urusan ahirat, tapi amun saban malam kasihan jua anak bini. Maka makanan rancak babasian karna sampiyan haur kada makan di rumah,” ujar bininya.

“Simpan haja di kulkas umanya ai, tangah malam aku kalaparan pulang. Kaina aku panasi saurang,” ujar Palui.

“Itu nah, tatak-tatak pang sisingut sampiyan itu. Galianan banar ulun malihatnya. “ ujar bininya itu rancak manyuruhakan. “Sisingut ini pamanisnya haja umanya ai,” ujar Palui pulang.

“Pamanis nangapa. Tumbuhnya haja kada rata alias jarang-jarang wan pina carucukan kasana-kamari kada jalas bantuknya,” ujar bininya pulang.

“Kaina haja umanya ai manataknya. Aku handak tulak basungsung karna wadah babacaannya jauh banar,” ujar Palui langsung tulang manggalunyur.

Wayah sampai di wadah urang babacaan langsung Palui mancari wadah duduk gasan maandak sajadah. Karna inya tulaknya sungsung, maka kawa inya dapat wadah di shaf paling muka.

Imbah sambahyang magrib, lalu dilanjutakan wan babacaan nang dipimpin ulih tuan guru sambil mahadang waktu sambahyang isya. Wayah baisya hanyar makanan, lalu di lanjutakan bacaramah pulang sampai parak pukul sapuluh, lalu bulikan.

Wayah bulikan bubuhan jamaah bagiliran basalaman dan sakaligus mancium tangan guru gasan maambil apuahnya.

Wayah sampai giliran Palui maka bahimat disalaminya tangan guru itu lalu dicium-ciumnya tanda sayang dan tarima kasih. Palui mancium tangan tuan guru itu lawas banar.

Rupanya karna kalalawasan itu maka jamaah lain nang umpat baantri di balakang sarikan. Sakalinya kada cuma nang di balakang nang sarik, bahkan tuan guru itu pun umpat jua sarik. Babarapa kali sidin manarik tangan tapi tatap kada Palui lapas, tatap diingkutinya tarus.

“Kanapa maka ikam mangaras kada malapas tanganku Lui?” ujar tuan guru sarik.

“Amun guru mangarasi manarik tangan, ulun bakuciak,” ujar Palui.

“Kanapa ikam maancam aku Lui,” ujar tuan guru makin bahimat manjuhut tangan sidin.

“Ampun maaf tuan guru ai, kita kahiga satumat sakaligus bacari gunting, gasan mamutung sisingut ulun,” ujar Palui takuringis makin pisit maingkuti.

Imbah maitihi bujur-bujur, hanyar tuan guru tadi paham dan kada jadi sarik malah sidin mangalakak tatawa. Rupanya wayah Palui bahimat mancium tangan guru itu tadi, sisingutnya takait tapuntal wan utas sidin hingga kada kawa dilapas lagi. Palui takuringis kasakitan makanya inya mambawai guru ka pinggir supaya sisingutnya ditatak haja jangan dibarubut kaya mancabut bulu hayam.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.