Kisah Bakamih Kanyamukan

Palui wan Garbus sudah lawas banar baniat handak ka Banjar mailangi kaluarganya tapi macam-macam haja halangannya. Bila Palui nang puang gawian, si Garbus ada kasibukan nang kada kawa ditinggalakan. Sabaliknya bila Garbus sudah kawa maninggalakan gawian maka Palui pulang nang bahalangan.

“Pabila jua kita kawa tulakan Lui ?” ujar Garbus.

“Aku ja kupaksakan isuk kita tulakan, tapi jangan baisukan karna masih ada nang kutuntungakan,” ujar Palui.

“Kalu kada kawa baisukan atawa tangah hari maka kita bataksi kamariannya haja,” ujar Garbus.

“Akur, aku akur Bus ai. Tapi kalu tulak kamarian maka wayah tulakan harus batapih supaya nyaman singgah gasan ba-magrib wan ba-isya,” ujar Palui.

“Kita tulakan pukul lima dan aku katuju haja kita tulakan batapih wan bakupiah,” ujar Garbus mambawai Palui mancari taksi.

Wayah parak magrib, mutur taksi nang ditumpanginya singgah kampung sabalum Pulau Pinang, singgah di warung halus haja parak kantur kuperasi pedesaan.

“Kanapa maka kita singgah disini, kada di Pulau Pinang atawa di Binuang,” ujar Garbus manakuni supir.

“Disini makan nginumnya murah, kawa bahutang dan ada rumah gasan umpat bamagrib,” ujar supir.

“Mana kakus wadah bakamihnya Bus ?” ujar Palui pina kirik-kirik handak banar bakamih.

“Aku kada tahu jua Lui ai, ayu kita bakamih di higa rumah itu haja parak kabun gumbili,” ujar Garbus mambawai karna inya handka banar jua bakamih.

“Nah, inilah untungnya kita tulakan batapih jadi kada ngalih mamacul salawar,” ujar Palui sambil manyangkutakan tapih ka bahu dan langsung mahajan kamih. Dihiga Palui badiri Garbus, sama-sama handak bakamih. Wayah itu paharatan banyak banar nyamuk maiguti muha, tangan dan batang pahanya tamasuk burung Palui.

“Akai, akai sakitnya, bangsat nyamuk maigut barangku,” ujar Palui gagarunum.

“Napa diakaiakan Lui, jangan diakaiakan tapi ditapak wan tangan,” ujar Garbus manyuruh.

“Tangan sabalahku maingkuti tapih dan sabalahnya mainguti anuku, bila tangan kanan kulapas maka tapihku bisa takana kamih, rigat dan najis. Makanya tulung Bus ingkutiakan pang burungku supaya kamihnya kada mamurancing, karna aku handak mahimat manapak nyamuk si bangsat itu,” ujar Palui minta tulung wan Garbus.

“Ayu ja aku hakun manulung maingkutiakan Lui ai sampai ti’is kamihnya tapi kita bagagantian,” ujar Garbus mulai manyurung tangan manulung Palui.

Imbah Palui wan Garbus tuntung bakamih, lalu mangalakak tatawaan sambil Palui baucap : “Untung kita sama-sama lalakian jadi kawa batutulungan, jaka wan bibinian pasti lain pulang kisahnya” ujar Palui langsung babuat kamutur taksi.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.