Kisah Kupiah Palui

Hari ini Palui sibuk banar bagawi, bulik karumah parak kakadapan, imbah sampai dirumah langsung minta ambilakan tapih lawan nang bini.

“ Oi abahnya! Tadi ada urang subalah basaruan, kaina imbah isa datangi jar handak bahaulan” ujar bini Palui mamadahi. Nang sakalinya Palui babungkun kalapahan di dalam kamar.

“Bujurkah umanya, kaina mun imbah isa bangunakan akulah, aku handak saruan jua” ujar Palui. Imbah satangah jam Palui dibangunakan diluar kadangaran urang urang galu bajalan manuju rumah nang baaruhan.

“Ui umanya kupiah ku mana yu?” ujar Palui manakuni kupiah buruknya. Mulai sabaharian inya mamakai kupiah itu wan kada sing gantian karna ujar Palui kupiah buruknya itu banyak apuahnya.

“Nah kada tahu ulun abahnya ai, bakas nang samalam dimana pian maandak?” ujar Bini palui manyahuti wan balik manakuni.

“Aku kada ingat jua umanya ai nah, makanya aku tadi batakun wan ikam” ujar Palui sudah mulai sarik, samantara diluar urang sudah sunyi laluan, dan di sabalah rumah sayup-sayup tadangar urang batahlilan.

“ingatakan abahnya ai dimana pian maandak kupiah nitu samalam”ujar bini palui manyahuti pulang sambil bajalan maninggalakan Palui nang sibuk kikih-kikih mancari kupiah buruknya.

Kada biasa Palui sasibuk itu bacacari, sampai inya muyak kada jua saling dapatan. “Dasar sial banar malam ini aku” ujar si Palui manggarunum. Sampai urang-urang tadi nang saruan sudah mulai bulikan kada jua dapat.

“Maa…ai Bus aku puas banar hari ni saruan kam” ujar suara Tulamak kadangaran pas lewat muka rumah Palui.

“Aku puas jua Mak ai saruan tadi, napang iwaknya ganal-ganal bilang kaya tabah hirisan dagingnya” ujar Garbus manyahuti. Samantara Palui maintipakan batambah kada kakaruan rasa inya mana parut lapar ditambah mandangar kakawanan saruanan ganal-ganal iwaknya.” Rugi banar aku malam ini kada taumpat” ujar Palui bagarunum pulang.

Sambil manyasali kajadian itu, Palui pina asa panat lalu inya barabah diatas gulungan tikar purun, tapi kada lawas bangun pulang karna ada asa mangganjal badugul didalam gulungan tikar nang dirabahinya tadi. Imbah dibuka gulungan tikar tadi, Palui takajut wan bacampur sarik nang sakalinya itu ti nang di cari-cari hanyar tatamu, kupiah buruknya tatabun di gulungan tikar, nang ngaran kasarikan Palui balakas kadapur maambil parang kamudian di cancangnya kupiah buruk tadi, bini Palui kada sampat lagi manangati wan sapalihan takutan jua kalo pina tarimbat-rimbat.

Palui taduduk marasa puas imbah mancancang kupiahnya.” Nah tamat sudah riwayat kupiah buruk ku” ujar Palui imbah malampiasakan rasa muarnya.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.