Kisah Aksara Arab Gundul

palui-174Palui dapat tugas mambantu bubuhan petugas kacamatan, melakukan cacah jiwa karumah-rumah warga penduduk, salajur handak mangatahui siapa-siapa nang sudah bisa mambaca wan manulis dan siapa-siapa nang masih buta huruf.

Patugas matan kecamatan ini urangnya masih anum, tapi gayanya hibat, langkap mambawa buku, map surat, malahan kumplit wan kasit rekaman dan kamira foto, kaya bubuhan wartawan haja.

Wayah buhannya ini datang karumah Tulamak sebagai kepala keluarga, maka berlangsunglah tanya jawab, cukup bagus wan lancar. Tapi wayah mahadapi Kai Alif, mamarina Tulamak, lalu tasandat-sandat alias kada lancar lagi.

Siapa ngaran sampian, Kai? takun patugas itu kaya wartawan. Ngaranku Alif Lammin bin Yasin, sahut Kai singkat tegas.

Berapa umur pian? Aku kada ingat lagi, kira-kira pitung puluh tahun, ujar sidin.

Apa gawian sampian?

Aku ini urang Nagara, gawianku hanya baitik, batampa maulah parang, lading tajak dan lain-lain,

Bisakah sampian membaca manulis huruf Latin?

Huruf latin itu, napa? ujar kai alif kada paham.

Huruf zaman Belanda istilahnya Kai ai, nang kaya di surat-surat kabar.Oo…itu kah, kada bisa aku, ujar Kai.

Amun damintu, sampian ini ulun masukakan di kalompok buta hurup alias buta aksara, kai ai.

Aku kada hakun disambat buta huruf, sabab aku ini bisa haja membaca Quran wan aksara arab gundul. ujar Kai.

Hau…apa itu hurup arab gundul kai?

Arab gundul itu bukan arabnya nang bagundul, tapi aksaranya nang gundul kadada babaris. Dahulu wayah anum, kami balajar kitab Tauhid sipat dua puluh, kitab Parukunan, kisah-kisah Tutur Candi Agung, syair-syair Berahma Sahdan, Siti Zubaidah, Carang Kulina, banyak lagi. Kami basasairan wan balagu, walaupun kami kada bisa mambaca hurup Latin, ujar Kai. Patugas cacah jiwa jadi supan saurangan.

Nah, amun ikam bapadah kada buta hurup, ayu pang tuliskan ngaranku pakai hurup Arab gundul ujar kai.

Maap kai ai, ulun kada bisa, jawab patugas kasupanan saurangan.“Artinya ikam itu tuh ai tamasuk buta hurup jua,” ujar kai tatawa banar.

Palui wan Tulamak samasama takuling kapala mandangar kai kawa mangalahakan patugas cacah jiwa tadi.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.