Kisah Haraga Tangah Malam

sipalui-04Bulang bulik ka Banjar atawa ka Jawa bagi Palui sudah kada asing lagi, artinya kada cagar sasat, kada kawa dibunguli lagi ulih supir atawa tukang bica. Inya sudah tahu liku-liku jalanan dimana jalanan nang sa arah, dimana harus bapiluk atau kada bulih dilalui.

Karna dahulu inya sawat bakakarasan lawan supir taksi, dibawa bakuliling lalu ungkusnya ditagih dua kali lipat, padahal jalannya kada jauh pada alamat nang ditujunya.

Sakalinya si supir bujur haja kada mangaramputi karna jaraknya bajauh sabab jalannya hanya saarah haja. Kaya itu jua Palui biasa manumpang taksi kuta, sarik lawan supir karna jaraknya parak haja lalu ditagih sama lawan nang jauh.

“Maaf pak, ungkus taksi kuta ini jauh atawa parak sama haja,” ujar supir manjalasakakan.

“Kalu kaya itu aku kada jadi turun, aku umpat haja kamana tujuan ikam,” sahut Palui.

Sakalinya ungkus bulang bulik Palui jadi dua kali lipat jua, padahal mulanya inya handak mangalahakan supir mandangar jawaban jauh dekat sama haja.

Sakalinya inya nang tapakalah. Tapi biar Palui rancak ka Banjar atawa ka Jawa inya balum tahu wadah makanan nang nyaman lawan nang murah.

Wayah inya ka Banjar lawan Garbus, dibawainya makan di rumah makan minang, lalu Palui bausaha mahabisakan apa nang dihidangakan.

“Lui…..ingat-ingat Lui. Amun dihabisakan ikam cagar mati kakanyangan lawan aku cagar lucut mambayarnya,” ujar Garbus.

“Sayang, kaina tabuangbuang kalu kada dihabisakan,” sahut Palui takulumkulum muntungnnya.

“Nang kita bayar adalah nang kita makan haja, jadi amun dihabisakan katuju banar bubuhan tukang warung,” ujar Garbus.

Malam isuknya Garbus mambawai pulang Palui makanan, sambil batakun makanan apa nang dikatujuinya. Palui manjawab tasarah lawan Garbus haja kamana handak mambawanya.

“Kalu kaya itu malam ini ikam kubawai ka resturan hutil babintang tapi supaya rami malihat urang badansa kita kasitu imbah tangah malam haja, ujar Garbus.

“Kita makan bubur hayam haja, pasti nyaman apalagi haraganya murah bisa saparu haraga haja,” sahut Garbus.

Sambil mandangarakan lagu lawan urang badansa Palui takisir jua handak umpat tapi ditangati Garbus. Garbus mamasan dua piring bubur hayam istimewa nang haraganya murah banar.

“Kanapa maka haraga buburnya murah banar padahal resturan ini ada di hutil babintang, apa karna bibas pajak atawa karna haraga ubral?” ujar Palui batakun.

“Ini haraga husus tangah malam parak subuh. Cuba ikam rasani……” sambil Garbus manyuruh Palui mamakan bubur nang sudah ada dihadapannya. “Kaina ikam cagar tahu kanapa haraganya bisa murah sampai saparu tarifnya,” ujar Garbus.

Imbah mahabisakan buburnya sambil takurasam Palui baucap lawan Garbus :”Pantas haja haraganya murah, karna buburnya sudah hangit kalawasan manjarangnya. Apalagi tangah malam ini sudah kadada lagi tamu nang mamasannya,” sahut Palui.

“Nah…..paham kalu ikam. Nang panting naik ka resturan babintang ini kada makanannya tapi harat dipandang urang sahut Garbus mangalikik tatawa sambil manyirit Palui.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.