Kisah Pisang Basanga Babanam

sipalui-06“Laki ini, lakas paham. Bila aku ada gawian lain maka inyalah nang manggantiakannya, mahuan anak, maisi drum, batatapas, manjarang banyu dan bamasak,” ujar bini Palui mamuji lakinya nang hakun baharaguan di rumah wayah inya sibuk baurganisasi.

“Itulah cuntuh laki nang baik, walaupun kabisaannya cuma satangah-satangah,” sahut Tulamak manimpali pujian bini Palui.

“Kanapa maka ikam padahakan satangah-satangah Mak, satangah itu artinya bungul kada pintar kada?” ujar Garbus.

“Napa buktinya bahwa lakiku dipadahakan kada pintar dan kada bungul,” ujar bini Palui manggasak minta bukti lakinya kada pintar.

“Buktinya, samalam wayah bini Palui mahadiri paringatan Hari Ibu, aku bailang ka rumah Palui. Wayah itu aku disurunginya nginuman dan guguduh pisang, guguduh gumbili, bigi nangka.

Guguduh pisang wan gumbili itu hirang banar, lalu kutakuni Palui, pisang wan gumbili ini kaya apa mamasaknya Lui, nyaman haja tapi warnanya hirang banar, latat kaya harang,” ujarku manakuni Palui.

“Pisang ini adalah pisang babanam maka itu warnanya hirang,” sahut Palui pina supan kasisipuan.

“Kalu pisang atawa gumbili babanam mustinya karing, tapi kanapa maka pisang wan gumbili ini pina rasap minyak,” ujar Tulamak.

“Haha… hahaaa… Inilah salah satu bukti bahwa Palui ini wayah ditinggalakan bini, kabiasaanya satangah-satangah,” ujar Garbus mulai paham bahwa Palui pangaramput.

“Hi’ih, aku mangaku tarus terang Mak ai bahwa pisang wan gumbili itu sabujurnya adalah kusanga, tapi karna aku kada tabiasa baharaguan di dapur lalu manyanganya kahangitan, hirang dan latat. Karna aku supan wan bubuhan ikam maka tapaksa kupadahakan pisang wan gumbili itu adalah babanam padahal sabujurnya pisang wan gumbili itu kahangitan manyanga, karna kabarauan api dan kapanasan minyaknya,” ujar Palui mangakui kabubungulannya.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.