Kisah Tajajak Batis Kawan

sipalui-11Dua talu hari ni Palui lain pada biasanya. Nang biasanya kada kawa salah sadikit lalu sarik, dua talu hari ni pina banyak lihumnya. Napa lagi, hati sanang lalu kurihing tarus.

Jangan kakawanan nang rancak marutit di warung, anak wan bininya saurang gin di rumah bingung malihatakan kalakuan Palui nang luar biasa alias lain pada biasanya tu.

Paribasanya, disuruh nang bini babarasih sabijian rumah gin kada sarik. Han, saking himungnya hati Palui.

Baisukan Ahad tu, imbah basubuh di langgar Palui balinggang kaluar tumat langgar. Linggang batis pina hampul. Sing siut-siut ha muntung kaya bunyi suling.

Rahat mamuruk ka sandal di tiras langgar, tang ada bingungnya aja Palui. Saikung kakawanannya nang kaya Tuhirang, Garbus, wan Tulamak kadada. “Nah, ditinggalakannya bulikan badahulu aku ni. Bilang liwar kakawananku ni. Awas kaina buhan ikam,” ujar Palui gagarunum.

Sapanjang jalan kada sing bunyian lagi inya. Hati nang pina sarik pina ditahaninya.

Babaya sampai ka halaman rumah, timbul pina bingung aja inya. “Hau, kanapa rumah maka sunyi kaya ini. Manaan biniku wan anak-anakku. Ampat ikung baisian anak, maka kada talihat saikung-ikung, masih baisukan pulang harinya,” ujar Palui dalam hati.

Palui nang asalnya sudah pina banyak kurihing mulai am pina pusang. Kayapa kada pusang, mun imbah sumbahyang subuh sudah ditinggalakan kakawanannya. Babaya sampai di rumah, bini wan anak-anaknya pulang nang kadadaan. Tunggal butingan kamar dimasukinya mancari bini wan anaknya tatap kadada talihat.

Padahal Palui sudah mahayal-mahayal rahat sampai di rumah langsung minta ulahakan kupi wan bininya. Imbah itu duduk di tiras sambil makan wadai. “Bah, hapuk tu pang jaka tida. Ini timbul parut lapar,” ujar Palui pulang gagarunum.

Imbah itu kuciak-kuciak inya mangiyau bini wan anak-anaknya, tagal tatap kadada sahutan sama sakali. Kapuputingannya mauk sorangan Palui, langsung inya mangincang bajalan ka dapur handak baulah saurang banyu kupi.

“Baulah saurang aja sudah. Awas kaina bila datangan, kumamayi tunggal ikungan tu pang,” ujar Palui bajalan sambil manyanyarik.

Babaya mambuka hurdin dapur sakalinya urang hibak bakumpulan di dapur, mulai dari bininya, anak-anaknya, Garbus, Tulamamak, wan Tuhirang umpat jua bakasak di dapur tu.

Rahat Palui tanganga-nganga malihat urang hibak di dapur, Utuh Halus, anaknya nang pahalusnya langsung baucap, “Selamat Ulang Tahun Abah! Mudahan pan panjang umur wan disihatakan badan,” ujarnya. Di mija dapur tu langkap makanan wan minuman, Mulai dari nasi kuning, katupat kandangan, wadai cincin, gagatas, wan nang lain-lain.

Palui nang asalnya handak sarik timbul pina rawan. Inya kada ingat kalu hari itu inya ulang tahun.

“Alhamdulillah… Tarima kasih,” ujar Palui kada kawa manarusakan lagi. Banyu matanya pina barubuyan.

“Kada usah sadih atawa manangis kaya itu Lui. Santai haja muhanya,” ujar Garbus mamadahi.

“Aku manangis kada maraga sadih pang. Tagal jariji batisku dijajak Tulamak nah! Sakit tahulah!” ujar Palui. Lucut urang sarumahan manawaakan Palui nang kasakitan.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.