Kisah Lanjung Ganal

sipalui-19Wayah hari parai samalam Palui mambawai anaknya tulakan ka pahumaan karna bininya kada kawa umpat. Biasanya, inya bakawan wan Garbus atawa Tulamak. Rupanya, hari itu walaupun sudah bajanji Garbus wan Tulamak bahalangan jua.

“Ikam kawa kalu mangganii abah karna hari ini sakulahan parai dan ikam kada sakulah jua,” ujar Palui.

“Ulun katuju banar bah ai, tapi ulun kada bisa mangatam,” sahut anaknya.

“Maksudku kada mangganii mangatam tapi mangawani haja karna hari ini abah kadada kawan,” ujar Palui.

Imbah disadiakan bininya bungkusan sangu baisi banyu wan nasi bungkus maka Palui wan anaknya tulakan bajalan batis. Sasampainya di pahumaan inya takajut banar karna pahumaannya cacap banyu bakas hujan saharian samalaman.

“Wayah tulakan tadi ulun handak jua baucap bah ai mamadahakan kalu pina pahumaan babanyu, tapi ulun kada wani manyambat kalu pian sarik,” ujar anak Palui.

“Kanapa maka ikam kada wani manyambat kalu urusan nang baik dan kada cagar manyakiti,” ujar Palui sambil bapikir bahwa kabiasaannya sarik itu diingat banar ulih anaknya makanya inya takutan.

“Inggih Bah ai, sampiyan biasanya kada hakun dibari pandapat pasti sarik,” ujar anaknya. Imbah baucap itu anak Palui lalu bakuriak kasakitan. “Akai, akaiii … sakitnya,” ujar anak Palui ba-aduh kasakitan.

“Kanapa nak, ada apa maka bakuriak kasakitan,” ujar Palui mamaraki anaknya. Sakalinya talapak batis anaknya badarah luka kana papaci. “Ayu lakasi dibasuh, kaina abah kasai wan pucuk pisang,” ujar Palui sambil mamamah pucuk pisang dan bapikir pulang bahwa inilah akibat anak wani manjawab urang tuha.

“Ulun kada kawa bajalan Bah ai, sakit banar. Bagarak sadikt haja tadarah pulang lukanya,” ujar anak Palui.

“Kalu kaya itu kita kada jadi mangatam karna pahumaan cacap banyu, ayu kita bulikan haja,” ujar Palui.

“Ulun kada kawa bajalan Bah ai, sakit banar,” ujar anak Palui takuringis.

Kada bapikir panjang lagi, Palui ma-ambil lanjung ganal nang dibawanya lalu langsung baucap:

“Ayu lakasi babuat ka dalam lanjung ini, kaina abah hambin,” ujar Palui manyuruh anaknya.

“Bila ulun babuat kalanjung itu ulun ampun maaf Bah-lah, kaina ulun bisa katulahan mauyuhi sampiyan,” ujar anaknya takutan disariki Palui.

Wayah di jalanan Palui nang mahambin lanjung ganal itu batamuan wan Tulamak, lalu Tulamak manyindir : “Baratlah bawaan? Bisa bapikul-pikul banih kataman di pahumaan nang babanyuan itu?” ujar Tulamak sambil manjinguk lanjung Palui, lalu inya mangalakak tatawa hahahaaa … malihat anak Palui mancungkung di dalamnya.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.