Kisah Merek ML

sipalui-23Anak palui nang lalaki pina ngalih banar diurus, sudah balajar pina kuler, balum lagi kalakuannya nang kada tapi sanunuh, tamasuk urusan bapakaian. Limbah digosokakan baju gasan sakulah, paling sajam, baju tu liwar rigatnya lawan tanah atawa bakas makanan. Balum lagi urusan panampilan nang lain, pina kurisaan tu pang malihatnya.

“Balajar pang nak babengkeng-bengkeng, jangan kurisaan kaya itu,” ujar bini Palui managur anaknya wayah handak tulak sakulah.

“Gasan apa babengkeng-bengkeng ma, ulun ni balum ganal jua,” ujar nang anak manyahut.

“Biar balum ganal nak ai, amun matan lagi halus sudah tabiasa rapi, nyaman jua malihatnya,” ujar nang uma.

“Biar ulun bahimat barapi-rapi bapakaian, mun muha ulun kaya abah, tatap haja kada bungas,” ujar nang anak kada hakun kalah.

“Ikam ni katulahan mamadahi abah ikam kada bungas,” ujar umanya lihum.

“Mun handak malihat ulun bungas, babengkeng-bengkeng, tukarakan jua baju nang harat, minyak rambut, minyak harum kaya urang tu nah,” ujar nang anak pulang.

“Batagih sana minta tukarakan minyak harum wan minyak rambut lawan abah ikam,” ujar bini palui manunjuk ka Palui.

“Abah ada baisi minyak rambut kaluran hanyar nak ai,” ujar Palui. “Hadangi satumat abah ambilakan.”

Kada lawas Palui kaluar matan kamar. “Ini nah pakai minyak rambut ini, bisa harat rambut ikam nak ai,” ujar Palui.

“Merek napa ni bah?” ujar anaknya.

“Ini merek hanyar nak ai. Mereknya ML,” ujar Palui.

“Amun mancium baunya ni kaya minyak lamak abahnya ai,” ujar bini Palui imbah mancium. “Napa mereknya samalam bah?” ujarnya panasaran lawan bau minyak rambut itu.

“Mereknya ML umanyai. Sama lawan minyak rambutku bahari.

“Hadang dahulu. Minyak rambut pian bahari,… ML…. baarti ML tu Minyak Lamak jua ai?” bini palui mulai curiga.

“Lain Minyak Lamak umanya ai, tapi ML nang sabutingnya,” ujar palui pina ranai dicurigai bininya.

“Amun nang ML sabutingnya baarti Minyak Lanjar. Sama ML nya…dasar kaliwatan pian ni, kada bamodal, minyak lanjar di ulah gasan minyak rambut anak, kasiaan inya balilihan kalu kana panas,” ujar nang bini sarik-sarik.

“Minyak Lanjar tu baik umanya ai, kada bahuban rambut sampai katuha,” ujar Palui kada hakun disalahakan.

“Pian haja mamakainya, limbah itu sanga hintalu diatas rambut pian,” ujar nang bini kasarikan.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.