Kisah Kalu Dibagi Adil

sipalui-30Palui sabagai katua RT, disuruh pambakal supaya baulah kalumpuk usaha padesaan, nang kainanya dijadiakan kuperasi dan dibari tugas mambantu bubuhan dolog gasan mambagiakan sembako. Makanya sudah dua hari ini Palui mambawai bubuhan warga barapat.

“Aku sapakat wan pambakal supaya jangan sampai tajadi panyaliwengan atawa panyalahgunaan,” ujar Garbus imbah mandangar panjalasan matan Palui.

“Aku katuju jua,” sahut Tulamak. Karna wayahini urang pina rami banar bahaharatan, makanya kita parlu maulah kalumpuk itu supaya kita rakat dan jangan sampai dipacah balah,” ujarnya.

“Kita kada mungkin dipacah balah karna kita lain piring mangkuk atawa cangkir nang kawa pacah,” ujar Surawin “Aku bapander ini baamsal ibarat Win ai jadi ikam jangan salah tafsir,” sahut Tulamak.

“Kalu kaya itu siapa pangurusnya?” ujar Tuhalus.

“Nang pangurusnya kada lain si Palui,” sahut Tulamak.

“Nah….. tanyata ikam baamsal ibarat jua, si Palui kurus awak tapi biar kurus makannya kawa haja sampai talu kali batambah,” ujar Surawin mambalas panderan Tulkamak.

“Tapi biarpun kaya itu kami sabarataan katuju haja Palui jadi katuanya,” ujar bubuhannya.

“Tarima kasih kalu aku nang diparcaya dan dipilih, lalu siapa nang jadi panulis wan bandaharanya?” ujar Palui.

“Aku usul nang jadi panulis adalah Tuhirang,” ujar Tulamak.

“Kanapa maka ikam mamilih Tuhirang?” ujar Garbus.

“Karna Tuhirang nang paling rajin mancatat hitungan kalah-manang bila kita main dum dan inya jua nang paling rancak manggantung butul di talinga,” ujar Tulamak.

“Lalu siapa nang cucuk jadi bandaharanya?” ujar Garbus.

“Aku usul supaya ikam haja Bus ai,” ujar Tuhirang.

“Aku kada cucuk maingkuti duitnya karna rancak tapakai, kada ingat mancatat lalu jadi hutang,” sahut Garbus.

“Aku usul kaya apa kalu bandahara ini kita tunjuk wak haji Duraba,” ujar Palui.

“Napa alasan ikam manunjuk sidin?” ujar Garbus.

“Wak Duraba itu urangnya pintar mangatik hitungan, kamana haja sidin bajalan kada tapisah wan katikan tasbih,” ujar Palui. “Bandahara itu jua harus jujur wan adiladilnya, makanya wak Duraba itu bujur-bujur adil. Buktinya sidin babini ampat dan kawa mambagi adil gasan kaampatnya baik nafkah siang maupun nafkah malamnya,” ujar Palui sambil lihum.

“Napa buktinya Lui?” ujar Garbus.

“Buktinya ka-ampat bini sidin itu rukun-rukun haja, kada biasa bahihirian baganti hari wan baganti ranjang,” ujar Palui mangalakak tatawaan.

“Itu bujur-bujur adil sahut Garbus dalam hal balaki babini, tapi balum tantu adil kalu maingkuti duit kuperasi kalu kaina dibagi sidin adil jua gasan bini-bininya,” ujar Garbus kada kawa manyatujui usul Palui itu.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.