Kisah Ubat Ngalu

sipalui-39Satiap sabulan sakali bubuhannya pasti tulakan bajajalan ka Banjar. Salain mailangi kakawalan nang di Banjar, bubuhannya jua katuju balalihat ka pasar-pasar ganal nang ada di Banjar.

“Tampulu hari parai baiknya kita basilaturahmi ka wadah kakawalan di Banjar,” ujar Garbus mambawai Tulamak.

“Aku akur haja Bus ai asal bawai jua Palui karna kada rami kalu cuma baduduan,” ujar Tulamak.

“Palui itu akur tarus Mak ai apalagi di sana ada kaluarganya,” sahut Garbus.

“Nah, karna ada kaluarganya itulah kita manfaatkan supaya kita kawa bamalam,” ujar Tulamak sambil manunjuk Palui nang hanyar datang.

“Sabalum ikam bapadah maksud bubuhan ikam itu Mak ai, aku sudah mambaca kurihing ikam,” ujar Palui.

“Kalu kaya itu pas banar, mancari hundayang tatamu suluh,” ujar Garbus kasukaan.

“Baiknya kita bamutur sidan haja Bus ai,” ujar Palui.

“Mutur sidan itu larangungkusnya Lui ai, apalagi salawas BBM naik,” ujar Garbus.

“Kita naik taksi haja, kalau  parlu umpat trak batu bara supaya parai,” ujar Tulamak.

“Karna bubuhan ikam manyapakati naik taksi, ayu ja aku manurut haja,” ujar Palui mangalah.

Wayah tulakan bataksi, balum sampai di Binuang, Palui sudah pina lintuk kauyuhan, babarapa kali handak muak tapi ditahannya. “Basandar haja Lui ai, pajamakan mata supaya kada mauk,” ujar Garbus manasihati.

“Aku tahan haja Bus ai, aku kada handak muak Bus ai, hanya kapalaku rasa ngalu kada tahan mancium bau bensin. Biasanya bila tulak bamutur taksi ini aku mambawa ubat ngalu kapala, tapi tadi karna tagasak-gasak lalu kada ingat,” ujar Palui.

“Jangan hawatir Lui ai, aku ada parsadiaan babarapa bigi. Tadi kubuat dalam kantung jakitku,” ujar Tulamak sambil mahahar kantung jakitnya. Imbah dapat ubatnya lalu Tulamak manjulung ka Palui sakaligus wan banyu aquanya.

“Langsung sulum ka dalam muntung, taguk lalu nginum banyunya,” ujar Tulamak manyuruh.

“Tulamak ini bujur-bujur aputik bajalan karna ka mana-mana pasti mambawa ubat,” ujar Garbus.

“Hau, tadi aku mambawa talu bigi tablet ngalu kapala tapi kanapa maka di dalam kantung jakitku masih ada katalunya, padahal sabigi sudah diuntal Palui,” ujar Tulamak gagarunum sambil malihatakan katalu tabletnya ka Garbus.

“Itu nah Paluinya sudah pina taguring,” ujar Garbus.

“Kalu kaya itu nang diuntal Palui tadi lain ubat ngalu kapala tapi kima bajuku nang pagat lalu kubuat dalam kantung jakit ini,” ujar Tulamak mangalakak tatawa.

“Jangan nyaring tatawa Mak, tanyata kima baju kawa maampihi ngalu kapala Palui,” ujar Garbus umpat manawaakan.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.