Kisah Asa Wan Umanya

sipalui-42Palui tamasuk urang nang katuju babisnis. Wayah ini Palui babisnis wasi tuha, maka dimana haja mandangar ada urang bajajual wasi inya pasti tulak manyasah. Kada lawas tadi Palui babisnis ka subarang banua manukari wasi kapal baburung, lalu dirahainya hanyar dijualnya pulang ba-kilu. Biasanya inya kada kawa lawas madam karna dandaman wan bininya, tautama wan nang satangkup itu.

“Kanapa Lui maka ikam sakali ini lawas banar madam ka Jawa sana. Biasanya satumat babulik ka banua, kada sampai saminggu cangul pulang,” ujar Tulamak batakun.

“Jangan-jangan ikam sudah dapat tatambanya di sana,” ujar Garbus umpat manyahut.

“Bujur ujar ikam itu Bus ai, saratus gasan ikam,” ujar Palui.

“Kalu kaya itu ikam babini pulang, baarti ikam maingkari wan janji nang ikam sambat bahari. Bahwa cinta ikam hanya wan si Zaleha saurang,” ujar Tulamak manuduh.

“Bubuhan ikam ini jangan manuduh nang macam-macam dahulu,” ujar Palui sarik.

“Aku sabujurnya nangkaya bubuhan ikam jua. Lamun sudah karinyiman nang di bawah tapi bini jauh tapaksa manukar jua,” ujar Palui lihum.

“Hau, kanapa baubahkah sudah. Kanapa waktu dahulu aku bawai, ikam kada tagawi karna ujar ikam barang ikam itu kada kawa lamun kada wan bini saurang,” ujar Garbus pulang.

“Bujur haja ujar ikam itu, tapi wayah ini kawa aku akali,” ujar Palui baagak.

“Maakali nang kaya apa Lui?” ujar Garbus kada paham.

“Hi-ih napa resepnya? Mungkin kawa aku turuti kaina,” ujar Tulamak batakun.

“Dangari nah,” ujar Palui babisik. “Wayah taakhir bulik samalam aku basangu foto biniku kubasuh ganal-ganal saukuran muhanya wan kutang biniku nang sudah dua talu hari dipakainya,” ujar Palui pulang.

“Hau kanapa maka mambawa foto bini wan kutangnya haja, kanapa kada urangnya haja nang diangkut,” ujar Tulamak kada paham.

“Biniku itu kada kawa umpat karna harus maurusi kakanakan nang masih sakulah,” ujar Palui.

“Lalu gasan napa foto wan kutang bini ikam itu,” ujar Garbus handak tahu. “Itu lah tatambanya sakira aku asa kada badosa wan biniku,” ujar Palui tatawa.

“Wayah aku manukar, kutang biniku tadi aku tutupakan ka hidungku. Jadi aku marasa mancium bau awak biniku saurang,” ujar Palui.

“Nah, lalu foto bini ikam itu gasan napa pulang?” ujar Tulamak panasaran.

“Foto tadi aku aku likapakan ka muha bibinian nang bajual tadi, jadi aku asa wan biniku saurang,” ujar Palui mangalakak tatawa.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.