Kisah Dicium Minta Sarak

sipalui-70Palui tamasuk urang nang katuju bagaya dan katuju balulucu. Tapi kanapakah sudah talu hari ini Palui pina sandu, katuju mangalamun wan bila digayai kada tapi mau tatawa.

“Lui.. kita bakawan matan halus, maka sakit sanang dan suka duka kita alami basama. Jadi jangan sampai sadih ikam itu disandang saurangan haja. Kisahakanlah napa pungkalanya, bila kawa kubantu atawa paling kada umpat mamikirakan,” ujar Garbus.

“Kukira biar kukisahakanpun ikam pasti kada kawa manulung. Karna masalahnya ini barat……. barat banar,” ujar Palui.

“Kisahakanlah Lui ai, kaina kubantu,” ujar Garbus.

“Ini tamasuk rahasia kalambu Bus ai, jadi ngalih disambat,” ujar Palui.

“Aku bajanji mambantu ikam, kalu parlu kita minta tulung wan tuan guru di Gambut, sidin bisa banasihat,” ujar Garbus.

“Biniku minta sarak, minta talak,” ujar Palui sadih.

“Mungkin ikam karancakan maminta,” ujar Garbus manggayai.

“Aku kada biasa maminta apalagi mamaksa, aku tagantung kahandaknya haja” ujar Palui.“Lalu napa pasalnya maka sampai bini ikam minta sarak.

Sabujurnya sarak itu halal-halal haja tapi justru kada dikatujui malah dibenci Tuhan,” ujar Tulamak umpat manyala pander.

“Biniku minta sarak hanya gara-gara kucium” ujar Palui.

“Wah wah, dunia sudah tabalik. Mustinya, bini bila dicium malah makin sanang banar dan makin cinta”, ujar Tulamak tatawa.

“Aku hiran jua, biasanya inya katuju banar apalagi bila sisingutku mulai labat,” ujar Palui.

“Kaya apa ikam manciumnya, mungkin bakakarasan dan bahimat maigutnya karna kasasayangan,” ujar Garbus.

“Karna kucium itulah maka pipi biniku itu luyuh sampai bangkak bananahan, samingguan ma-arit sakitnya,” ujar Palui.

“Kaya apa ikam manciumnya Lui?” ujar Garbus.

“Daripada aku banafsu banar handak mancium bini, sampai aku kada ingat lagi mamacul ruku banyala dimuntungku……… inya kukuriak kasakitan karna pipinya luyuh kana api rukuku,” ujar Palui pina sadih.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.