Kisah Kupiah Bagarak

sipalui-80Wayah bulan puasa kakanakan liburan sakulah, makanya bubuhan kakanakan itu banyak nang bamamainan di lapangan bal, di halaman kantur pambakal, di langgar atawa di masigit. Wayah itu jua inya baulah macam-macam mainan kaya baulah lugu, katikan, mariam buluh sampai mangumpulakan barang bakas gasan catukan bagarakan sahur.

“Bila bubuhan kakanakan bamamainan atawa baulah macam-macam alat mainannya jangan ditagur, jangan ditangati,” ujar Palui.

“Bujur Lui ai, nang panting bubuhannya kita bimbing supaya inya kada bajalanan kahulu kahilir nang kada kakaruan karna bisa manimbulakan calaka,” ujar Garbus.

“Bila talalu diawasi banar kakanakan bisa malawan. Aku ingat banar wayah lagi halus dahulu julakku karas banar, malarang ini kada mambulihakan itu. Dihadapan sidin aku panurut tapi bila sidin kadada tatap ampunku jua nang kugawi,” ujar Palui.

“Nah…….. itu lihati imbah inya uyuhan bubuhannya bisa haja ampih saurangan kada usah ditangati. Kaya itu jua kita imbah tuntung sambahyang luhur bulan puasa ini kauyuhan lalu baistirahat barabahan di langgar,” ujar Palui.

“Ada nang batingharap, ada nang batilantang wan ada jua nang talingkun guringan mahadang dauh asyar. Aku asa kauyuhan jua, handak maladar satumat,” ujar Palui.

Lalu inya bajalan ka balakang, imbah itu masuk pulang baparak tawing panghalat lalu langsung barabah, sambil muhanya ditukupinya wan kupiah.

“Ikam handak guringkah Lui?” ujar Garbus.

Palui kada manyahuti lagi, mambangal barabah babantal gulungan hambal. Karna Palui kada manyahuti lagi maka Garbus bagamat mamaraki handak maitihi kanyanyaman si Palui guring, asal barabah langsung mangaruh taguring. Tapi Garbus asa ragu jua, kada mungkin kanyanyaman kaya itu. Jadi dikiranya Palui musti hanya bapura-pura haja. Lalu bahimat diitihinya kupiah Palui, pina bagarak, bahanu pina bakarikut taangkat singgang kakiri tapi dibujurakannya pulang.

“Lui!” ujar Garbus pulang. Palui tatap kada manyahut lalu bunyi banyaring karuhnya. Lalu Garbus mangiyau Tulamak wan Tuhirang nang barabah diparak lawang, handak mambuktiakan bahwa Palui bujur-bujur guring banar.

Bagamat diparakinya, lalu bakajut dijuhutnya kupiah Palui.

“Hau…….hau…….kanapa ini,” ujar Palui. Galagakan bubuhannya mananawaakan Palui, sakalinya Palui kada guring tapi muntungnya kiyapkiyap mamamah lamang sambil muhanya batukup kupiah tadi.

“Katahuan akal urang kada pamuasa, biar sapuluh kali bapadah uyuh tatap kami kada parcaya,” ujar Garbus.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.