Kisah Kadapol

sipalui-89Palui pina maitihi banar lawan baju saragam nang hanyar dibagiakan kumandannya. Himung banar inya makai baju nangitu. Di muka caramin inya marasuk baju lawan salawar lalu bapandir saurangan.

“Kaya jendral jua aku ni nah limbah babaju nangini?” ujarnya gagarunum dalam kamar.

“Jendral apanya abahnya? Jendral kancil kalu,” ujar nang bini mahapak.

“Ikam ni umanya ai pina kada bangga lawan aku diangkat jadi sekuriti,” ujar Palui pina sarik lawan bininya.

“Aku himung abahnya ai, tapi jangan ba-agak bapadah jendral sagala,” ujar nang bini manyahut.

Kada Lawas tadangar matan luar ada nang mangiyau.

“Assalamuaikum Lui.”

“Waalaikumsalam, masuk ada haja urangya,” ujar bini Palui hapal siapa nang datang kada lain Tulamak wan Garbus.

“Napa habar bubuhan ikam?” ujar Palui manyuruh dudukan.

“Handak malihat ikam dapat gawian hanyar. Ikam lulus jadi satpam parusahaan kalu?” Ujar Garbus.

“Aku kada jadi satpam Bus ai, tapi sekuriti,” ujar Palui kada hakun dipadahi satpam.

“Satpam lawan sekuriti tu sama haja Lui ai..di tupi nya haja wayahini batulisan security,” ujar Tulamak.

“Kaya itukah, tapi nang panting aku dapat gawian jua ahirnya,” ujar Palui baagak.

“Kada usah baagak Lui ai, amun masin ada niputismenya. Kudangar bosnya kaluarga bini ikam kah?” ujar tulamak.

“Ada haja pang raitannya, biniku tu mamarina sidin.” “Pantas haja lulus amunnya ada hubungan kaluarga,” ujar Garbus.

“Amun satpam tu bapangkat jua lah Lui ? ujar Tulamak batakun

“Ada ai pangkatnya, jadi kumandan atawa kapala sekuriti.

“Pangkat ikam napa Lui? ujar Garbus.

“Aku ni pangkatnya KADAPOL,” ujar Palui ba-agak.

“Mana tingginya Lui KADAPOL lawan KAPOLDA?” ujar Tulamak maanyaki ka Palui.

“Randah banar Mak ai, dibawah parajurit pang,”

“kanapa jadi kaya itu Lui, aku kada paham nah,” ujar Garbus.

“Jalas haja ah KADAPOL tu artinya KADA POLISI ya tamasuk bubuhan hansip, kamra. Tapi aku tatinggi pada buhan kamra tadi,” ujar Palui tatawa.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.