Kisah Rambut Putih Pamanis

sipalui-84Paharatan Palui bacaramin wayah basurui inya takajut banar karna tarnyata di caramin dilihatnya kapalanya sudah banyak tumbuhan huban nang panjang panjang. Umanya lajui tulak ka pasar tukarakan aku samir gasan mahirangi rambutku ngini, ujar Palui kukuciak wan bininya.

Kada usah abahnya-ai umur sudah batuha jua sudah parak kapala ampat, biar ditutupi tatap tabulik pulang kaina, ujar nang bini.

Wayah batamuan wan Tulamak Palui bakisah masalah huban dirambutnya itu: Aku rasa kada parcaya diri Mak ai, ujar Palui pina sadih imbah tuntung bakisah.

Kada usah sadih Lui ai, kaya apa haja manusia itu pasti batuha. ujar Tulamak mambari nasihat.

Sudah lah ikam cuba basamir? ujar Tulamak pulang.

Sudah jua kugawi tapi babulik pulang kalihatan putihnya apalagi bila kana hujan maka hirangnya balilihan ka pipi, sampai biniku bamamai saban bulan haur manukarakan samir gasan rambutku haja.

Kalu aku Lui ai lain lagi, bila tumbuh huban di kapalaku ngini langsung kucabuti jadi lambat hanyar tumbuhnya, ujar Tulamak.

Rambut kada baik dicabuti Mak ai karna bisa marusak syaraf kapala, ujar Palui.

Napa pina rami mamander rambut Lui? ujar Garbus nang hanyar datang.

Kami mamander rambut putih pamanis, ujar Palui.

Tarus tarang haja Lui ai kada usah manyambat mudel rambut pamanis tapi sambatlah sajujurnya huban sudah maruput di kapala, ujar Garbus.

Makanya tadi kami wan Palui mamander kaya apa caranya supaya jangan tumbuh huban, ujar Tulamak.

Ooooo… kalu sual supaya jangan tumbuh huban, gampang Lui ai. Aku ada panamuan baru. Kalu ikam handak tahu, datangi aku isuk di rumah, ujar Garbus mambawai.

Isuknya Palui datang saurangan ka rumah Garbus, handak mancuba ubat supaya jangan tumbuh huban di kapala.

Ubat itu sakalinya adalah digundul.

Hahahaaa… hahahaaaa…, ujar Tulamak mangalakak mananawakan Palui wayah isuknya inya batamuan di warung acil Isul.

Sakalinya aku dikaramputi Garbus Mak ai, dipadahakannya dilarap sadikit di dahi dan sadikit di higa lalu diubati. Tapi nyatanya imbah kulihat pina lucu maka kusuruh gundul samunyaan, ujar Palui.

Kukira pas banar ubatnya itu karna bila digundul maka hubannya hilang samasakali, ujar Tulamak.

Ikam ini Lui ai tamasuk urang nang marasa diri anum tarus, kada hakun mangakui umur sudah parak satangah abad. Napa pun ubatnya Lui ai huban di kapala tatap tumbuh, makanya supaya kada kalihatan kapala bahatap seng, ubat nang paling mujarab adalah rambutnya digundul, ujar Garbus nang datang bakakajutan mangalahakan Palui.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.