Kisah Umpat Pitnes

sipalui-86Kada lawas tadi Palui sawat handak lawan bibinian. Kada urang lain, kawalnya segawian jua. Tapi rupanya kahandak Palui itu kada katulusan, bibinian tadi kada hakun lawan Palui, padahal Palui asa mat banar sudah lawan si Fatmah itu. Dipadahakannya awak Palui kakurusan, karimping kada baotot. Padahal kalu sual panampilan Palui tu kaya urang jua. Rambut bajambul, pakaian bagusuk tarus, ipuk kada suah puang. Asa sakit hati banar Palui mandangar bibinian nang dihandakinya manyambatnya nangkaya itu, asa dikarukut bidawang. Awas lah, kaina aku buktiakan, ujarnya garunuman.

Isuknya ditamuinya si Utuh Ganal, inya lalu batakun risip kaya apa supaya kawa baisian otot kaya si Utuh tadi.

Ikam kalu handak umpati aku kaina malam, aku jamin sabulan haja awak ikam jadi saterek kaya aku ini, ujar Tuganal manyanam ototnya manampaiakan lawan Palui.

Malamnya Palui baistilah basungsung maambili si Tuganal, imbah itu hanyar bubuhannya badua tulakan ka wadah nang ngarannya wadah pitnes.

Nah Lui disini pang aku latihan gasan mangganali otot, ujar Tuganal. Ikam mandaptar dulu, kaina ku padahi caranya wan napa haja manpaatnya alat-alat ini.

Imbah mandaptar, Palui manamui si Tuganal. Ikam handak mahalusi parutkah, atawa handak mangganali otot kah Lui? ujar Tuganal.

Parutku halus haja sudah Nal ai, aku handak mangganali ototku haja, ujar Palui langsung mancobai samunyaan alat. Mulai alat nang gasan maulah otot dada, otot tangan, imbah itu nang gasan otot balukuk lalu gasan sayap samunyaan dipakainya.

Uiii Lui, bagimit haja! Tuganal managur imbah malihat si Palui pina bahimat banar.

Nyaman lakas Nal ai, aku sakit hati banar disambat bibinian karimping kurus karing, amun ditiup angin bisa tarabang jar, ujar Palui garigitan.

Lihati kaina awakku satumat lagi saterek. Lui, sasadangnya haja Lui ai. Parmulaan ni jangan racap dulu, kaina takajut utut ikam, ujar Tuganal.

Isuknya saharian Palui kada kaluar pada rumah, inya dirumah haja tarabah di tilam kada kawa bagarak. Samunyaan ototnya asa kancang. Bahkan sampai talu hari Palui kada umpat bakakawalan. Kakawalannya bingung jua wan Palui.

Bisa inya pitnes siang malam supaya lakas mangganalakan awak, ujar Tulamak.

Baiknya kita takunakan wan Tuganal, ujar Garbus manunjuk Tuganal nang hanyar datang.

Uuii… Tuganal, Kamana kawal kita si Palui? Bujurkah inya pitnes siang malam? ujar Garbus.

Pitnes apanya? Sakali haja sawat umpat turun, imbah itu inya garing. Lawan hari ini artinya sudah manalu hari, ujar Tuganal.

Garing napa Nal? nang ku tahu Palui itu biar kurus karing, kada suah tadangar garing, ujar Tulamak hiran.

Ujar umanya, Palui talu hari kada kawa babangun. Ujar sidin inya kram saawakan, ujar Tuganal langsung maulah kakawalannya tatawaan karna tahunya Palui hanyar sakali umpat pitnes.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.