Kisah Hintalu Karuang

sipalui-95Salawas jalanan sudah baaspal, raminya kampung Palui makin batambah. Satutumat ada kunjungan pajabat nang singgah. Sampai sakali ini ada pajabat nang isuk handak singgah ka kampung Palui.

“Bus, isuk kita kadatangan tamu matan kabupaten,” ujar Palui mamanderi Garbus.

“Napa acaranya Lui?” ujar Garbus.“Acaranya silaturahmi haja, karna bubuhan sidin-sidin itu handak maninjau panambangan,” ujar Palui.

“Di wadah kita ini kadada panambangan kanapa sidin maninjau,” ujar Garbus.

“Bubuhan sidin itu hanya umpat singgah haja, karna parjalanannya jauh maka baistirahat di sini umpat sambahyang Ashar,” ujar Palui manjalasakan.

“Kalu kaya itu kita siapakan makanan napa Lui?” Garbus batakun.

“Karna singgahnya satumat haja, maka kada usah makanan tapi kita sadiakan nginuman wan wadainya haja Bus ai,” ujar Palui.

“Wah, kalu sahibar nginuman haja kada asyik,” ujar Tulamak umpat bapander.

“Jangan dipandang asyiknya Mak ai, tapi demi mahimat duit. Wayahini zaman krismun,” ujar Palui.

“Napa wadainya Lui?” ganti Tulamak batakun.

“Urusan nginuman wan wadainya kusarahakan wan Garbus lalu ikam pambantunya Mak-ai,” ujar Palui.

“Kaya apa kalo wadainya hintalu karuang haja,” ujar palui pulang.

Isuknya bubuhan tamu datangan, baistriahat dan sambahyang Ashar, lalu Palui mangiyau Garbus wan Tulamak.

“Bubuhan sidin sudah sambahyang dan surung haja nginumannya,” ujar Palui. Lalu kaluar Garbus wan Tulamak mambawa nginuman banyu setrup langsung mahidangakan.

“Kaluarakan jua wadainya,” ujar Palui manyuruh.

“Silakan nginum wan makani wadai alam nang disadiakan,” ujar Garbus.

“Ikam mambawa napa Bus?” ujar Palui hiran malihat Garbus mambuka bungkusan.

“Aku manyadiakan hintalu, ada hintalu hayam wan ada jua hintalu itik,” ujar Garbus sambil mambuka bungkusannya.

“Ikam pang Mak mambawa napa pina manyurung kurungan,” ujar Palui.

“Aku mambawa babarapa ikung burung,” ujar Tulamak malihatakan kurungannya.

“Astagfirulah, bubuhan ikam ini manyupanakan aku banar. Kanapa maka mambawa hintalu wan burung karuang itu?” ujar Palui sarik.

“Kami manyadiakan sasuai suruhan sampiyan, samalam sampiyan mamasan supaya disadiakan hintalu karuang, maka inilah hintalunya dan inilah burung karuangnya,” ujar Garbus wan Tulamak manunjuk.

“Salahku jua, salahku jua. Sudah tahu haja bubuhan ikam kada cukup hitungan tapi ku suruh jua,” ujar Palui manyalahakan kakawalannya.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.