Kisah Bakumpul Mintuha

sipalui-103Arisan ibu-ibu di kampung, rami buhan bini Palui, bini Garbus wan bini Tulamak umpat jua bakumpulan di arisan. Tiap Sanayan kamarian, saminggu sakali takumpulan jadi ajang curhat buhan ibu. Sabalum bacabut arisan, mambaca yasin, batahlil, wan tausiah tuan guru H Baderi.

“Nabi itu urangnya pamarasan, suka mambantu wan manulung urang nang kesusahan. Kaya itu jua buhan ibulah, amun kawa kalakuan kita?” ujar guru batausiah.

“Kaya apa guru bila ada kawan kita kasusahan, minta carikan solusinya inya, bulih hajakah?” takun bini Palui.

“Bulih banar. Kita carikan jalan kaluarnya sehingga inya ampih bamasalah wan dirinya?” jawab guru bijaksana.

Limbah tuntung tausiah, kemudian basurungan tuan rumah ka ibu-ibu nang umpat arisan kebetulan di rumah Palui.

Jadi umpat jua Palui basusurung matan dapur.”Oi Paluikah ada di dapur? Ka muka Lui, batatai duduk wan aku,” rawa tuan guru.

“Ulun umpat basusurung matan dapur haja, guru ai?” sahut Palui.

“Nyamanlah Lui, ikam dua laki bini saparanakan, mana mintuha?” takun guru.

“Kami balain, kami mambangun rumah biar halus asal kada manyewa, sidin kada hakun umpat kami?” ucap Palui asa himung.

Tuntungan arisan sakalinya bini Tulamak, curhat ka bini Palui.”Aku ini bini Palui lah, asa marista banar, baisukan sampat limbah Salat Subuh,disuruh mintuha ka pasar batutukar bahan gasan bawarung nasi,” ujar bini Tulamak.

“Kasihannya ikam, tiap subuhlah. Mana Tulamak, kada umpat ka pasarkah mambantu?” takun bini Palui.

“Tulamak taguring, rancak malandau. Jam delapan hanyar bangun, sudah bulik ulun dari pasar?” marista bini Tulamak.

“Mana ikam batianan, bini Tulamak lah,” sahut bini Palui pula. Makin marista bini Tulamak ya.

“Barapa digajih sabulan, bini Tulamak ikam?” Palui manyurung takunan.

“Kada bagajih Lui ai. Umpat bakumpul wan aku ini kada basewa rumah, ujar sidin Lui ai?” bini Tulamak titikan banyu mata.

“Kalu kaya itu baiknya ikam manyewa rumah, balain pada mintuha?” sahut Palui mancarikan solusinya.

Datang Garbus maambili bininya.”Napa raminya bapanderan?” takun Garbus.

“Ini Bus, carikan rumah sewaan, gasan bini Tulamak, handak ampih bakumpul mintuha?” ucap bini Palui.

Sakalinya datang jua Tulamak handak maambili bini.”Aku kada sanggup balain rumah pada mamaku?” sahut Tulamak.

“Lalu pang, diam di rumah mama pian taruslah ulun?” ujar bini Tulamak manyahuti.

“Aku handak berbuat bakti wan mamaku, sayang ai?” Tulamak marayu bini.

Kada jadi sarik bini Tulamak apalagi inya dipanggil sayang ulih lakinya. ”Ayu lakasi babuat nah,kita bulikan?” Tulamak mambawai bini, pisit ragapan bini Tulamak ka pinggang laki.

“Han jarku tatap hakun haja bakumpul mintuha?” ucap Palui sambil manggiling-giling kapala, tatawaan bininya, bini Garbus wan Garbusnya di rumah Palui.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.