Kisah Hajar Jahanam

sipalui-104Mangaku saraba lamah si Palui, jadi ada nang maras mandangar, kawan guru satu sakulahan. Apalagi Hj Istiqamah hanyar sabulan ini datang dari Mekkah.

”Oi… Lui,aku mandangar ikam saraba lamahkah?” takun bagamatan ibu Hj Istiqamah nang akrab disapa Hj Isti ka Palui.

“Di mana pian tahu,Bu?” takun Palui.

“Ikam sudah rahasia umum Lui ai. Siapa haja tahu bahwa ikam saraba lamah, iya kada?” Garbus sakalinya manyurung panderan.

“Ini aku ada Lui ai, mambawa ubat kuat matan Mekkah, kalu pang ikam handak mancuba gratis haja mun aku nang maunjuk?” jawab ibu Hj Isti pina kada asaan.

“Napa ngaran ubatnya?” takun Garbus.

“Diminum atau diuleskan, Bu Isti?” Palui jua panasaran.

“Ngarannya hajar jahanam, ubatnya itu jangan diminum Lui lah, itu ubat luar, alias diuleskan haja…,” jar ibu Isti lancar.

Limbah diberi hajar jahanam, Palui pina takarinyum tarus asa agak inya wan bininya.

”Aku umanya Amat ai, ada diberi kawan ubat kuat datang matan Mekkah, supaya ampih lamah, kaya apa akur hajakah,” ujar Palui ka bininya, waktu takumpul di rumah pas makan malam.

“Ulun te katuju haja, bila pian bausaha betatamba, napa rasa muyak banar sudah,lawas batahun-tahun lintuk tarus, sampai ulun handak minta sarak, dahulu te ingat kalu?” sahut nang bini lantih.

“Apa,Ma. Dipanderakan pian badua, lintuk tarus?” takun Amat anak Palui ka urang tuhanya.

“Itu Mat lah, bila aku malihat tv, mataku lakas lintuk karana sudah tuha, jadi lakas taguring?” ujar Palui manjawab sakahandaknya.

“Jadi ulun handaklah kaya itu jua supaya lakas guring?” sahut Amat.

“Lakasi ja Mat lah, lintuk mata pian, lakas taguring?” sahut mama Amat handak banar supaya anak lakas taguring.

Taguring sakalinya si Amat lakas, diuyuni umanya. Napa pada lakas jua Palui beraksi memanfaatkan pembarian ibu Hj.Isti, hajar jahanam.

”Umai abahnyalah, dasar bujur mauleskan hajar jahanam ini, pian kuat perkasa?” ucap nang bini takurinyum.

“Han jarku ikam handak lagi, kaya itu jua, buhan lakian Arab, inya kuat perkasa karana ada ubatnya sakalinya…,” Palui asa himung baucap.

“Ini kada hajar jahanam lagi abahnya ai. Tapi hajar tarus, aku makalahan am mahingal banar nah…,” ujar nang bini sambil tapajam mata manyambatnya.

“Ampihan am sudah, kasihan ikam, kena malam Jumahat ja, aku uleskan pulang?” ujar Palui lihum marasa puas, lakas dua laki taguringan.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.