Kisah Kopi Jesika

sipalui-105Banyak akal wayah ini urang gasan mancari usaha, supaya kawa tetap eksis. Macam-macam dilakukan gasan menarik minat masyarakat supaya hakun menukari produk ulahannya, kada terkecuali ulih urang Banjar jua, umpatan membuka usaha, di media sosial kaya urang nang ada di Jakarta.Keuntungan bausaha di media sosial urangnya bagana di rumah haja, tapi produk usahanya menyebar ka mana-mana, sampai manyubarang laut kawa.

”Aku pas maajar di kalas satu, takajut banar Bus ai,” ujar Palui ka Garbus.

“Napa maka takajut, ada nang takamih di salawarkah murid ikam Lui?” takun Garbus.

“Wayah ini kadada lagi pang nang kaya itu. Pintar-pintar haja murid sudah. Bisa haja inya bapadah permisi handak ka wc…,” sahut Palui.

“Lalu pang napa maka takajut?” takun pulang Garbus sekali lagi.

“Kaya ini nah, Bus lah. Pas aku malihat di dalam tas muridku itu, banyak bungkusan kopi mereknya kopi Jesika?” ucap Palui mulai bakesah.

“Sudah itu ikam apa kan?” sahut Tulamak umpat manyurung pander.

“Aku itihi gambar kopinya, Jesika nang mana? Atau apa?” Palui baarit kesah.

“Wanilah ikam minum kopinya?” ujar Garbus.

“Aku takutan nah, umpat maminum kopinya?” sahut Tulamak manakutani.

“Kaya ini nah nang bujurnya. Ngaran muridku itu Nadia Jesika Halimah, abahnya membuat kopi bubuk, mereknya bagambar wan bangaran anaknya Jesika, urangnya langkar bajilbab, aku dibarinya sabungkus, kapala sakulah, sidin dibari jua, jadi kami di kantur guru maminum kopi Jesika pang, nyaman banar, lanyap, buhannya ai,” jar Palui mangalahakan Tulamak wan Garbus.

“Sakalinya kopi nang seratus persen halal, iya kalu Lui?” Garbus baucap.

“Mantap Lui kopinya?” sahut Tulamak.

“Isuk kena aku bari sabuting saurang, kopi Jesikanya?” Palui manyahut, lihum Tulamak wan Garbus.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.