Kisah Kantur SPP

palui-09Di kantur pambakal salawas dapat dana desa ini, warga di kampung Palui dimudahakan dalam maakses keuangan gasan manambah mudal usaha. Kada sajuta, lima ratus ribu kawa haja mainjam. Saratnya KTP haja wan sudah ada usaha.

”Ikam Lui ai aku ulah jadi kapala kantur SPP di kampung kita ini, apalagi pangalaman ikam sudah cukup haja , jadi kapala urusan pambangunan mandua tahun,” ujar pambakal ka Palui.

“Siap ulun pambakal ai, kalu itu nang diperintahkan, pian,” sahut Palui tagas.

Saminggu kemudian mulai batugas Palui jadi kapala kantur SPP. Tiring-maniring Palui maitihi papan ngaran kanturnya nang hanyar. Kantur Simpan Pinjam Perempuan (SPP) singkatannya. Ngarannya mentereng banar.

”Umai Lui , ikam damini jadi kapala kantur SPP?” rawa Garbus pas batamuan di warung Galuh Yuni Sartika.

“Tenang haja Bus ai. Kalu ikam handak mainjam bisa haja, tapi harus jalas alasannya wan bausaha napa,” sahut Palui musti banar.

“Kena aku bisa haja Lui ai mainjam satumat, tapi pang malihat dahulu barangnya,” ujar Tulamak lantih.
“Ayuha kena datangi aku kantur SPP Mak ai,” Palui asa himung.

Gosip menyebar di kampung, bahwa Palui mambuka palayanan simpan pinjam perempuan. Rasa dicubit bidawang hati bini Palui malihat kalakuan laki wayah ini. Hanyar jadi kapala urusan di kantur pambakal, sudah macam-macam tingkah Palui.

”Napa abahnya Amat, pian jadi bos simpan pinjam bibiniankah? Banyaklah biniannya nang jadi simpanan ,pian?” ujar nang bini mahampasakan basa.

“Aku tarus terang haja umanya ai, jadi bos simpan pinjam perempuan, nang mainjam samuaan binian. Bukan artinya aku mainjamakan bibinian pang ka lalakian,” jawab Palui bahimat.

“Banyak alasan dicari-cari, apa mun bagalut bibinian di kantur pian, itu apa tujuannya. Pasti ja mahadang pasanan lalakian nang handak mainjam,” ucap nang bini cacarancang lantih banar.

Rasa takijat-kijat Palui dipadahakan bini jadi bos mainjamakan binian ulih bininya saurang.

”Nang bujurnya haja umanyalah, dangarakan bujur-bujur gawianku di kantur salawas dapat dana desa, aku disuruh pambakal mambuka simpan pinjam perempuan, khususnya binian nang parlu duit gasan manambah mudal usaha, kaya itu pang maksudnya?” jalas Palui.

“Nah iya pang, ulun nang tasalah paham. Ulun kira, pian mainjamakan bibinian gasan lakian nang handak mainjam gasan bagandakan atau besenang-senang, mainjamnya ka wadah pian, kada kaya itu kalu maksudnya,” bini Palui basuara tanda mangarti sudah gawian laki.

“Dasar bujur umanya ai,murni mainjamakan duit gasan binian nang baisi usaha di rumah atau di halaman rumah, bakiosan, bawarung wan lainnya. Ikam gin kawa jua mainjam duit ka kanturku,” sahut Palui lihum.
“Kada usaha mainjam, barii haja ulun abahnya ai,” bini Palui manyirit ka laki.

“Ayuha umanya ai, tapi aku minta jatah malam ini lah,” Palui lakas mancalok duit ka kantung.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.