Kisah Magrib Mangaji

sipalui-110Rasa himung Palui dua laki bini malihat anaknya nang bangaran Amat, limbah magrib sampai menjelang isya umpat mangaji tadarusan wan Guru H Iriansyah di masjid parak rumah.

”Barapa lambar sakali mangaji?” takun Palui ka anaknya.

“Satangah juz bila takana lancar, Bah ai,” jawab Amat.

“Hadiahnya apa abahnya, bila Amat khatam Alquran?” takun bini Palui.

“Kena hadiah sepeda BMX bakaskah, Mat lah. Nang panting sepedanya masih bagus…,” ujar Palui bajanji.

“Ulun indah sepeda Bah ai? Handak sepeda mutur trail…,” ucap Amat pina ungah kaabahnya.

“Makalahan am, kadada duitnya aku Mat ai, manukarakan, wan ikam baluman 17 tahun, kada bulih sebenarnya basapida mutur ka sakulahan. Cukup basapida BMX hajalah,” sahut Palui serius mambiasai anaknya.

“Inggih,Bah ai,” nang anak hakun manurut apa jar abahnya.

Bapanderen Palui, wan Garbus, Tulamak, bahanu pina lihum saurangan si Palui ini. ”Napa Lui takurinyum saurangan?” rawa Garbus.

“Aku rasa himung banar Bus ai, adanya program magrib mangaji di kuta Banjar tiap malam,” ujar Palui.
“Oh, damintukah,” Tulamak manyahut.

“Ini anak ku Amat lancar sudah mangajinya. Kada kaya nang abah bajuju banar mambaca huruf Arab… jadi aku rasa himung banar kaganangan wan anak ku?” sahut Palui maungkai rahasianya jadi rancak takurinyum saurangan.

Karana tiap malam mangaji, wan banyak kulihan 5 lambar sampai 7 lambar satiap tuntung mangaji, maka talakas jua batamat mangaji. Anak Palui ini sudah tabiasa mambaca surah-surah Alquran waktu inya balajar di TK Alquran tiap kamarian.

”Nah malam isuk kita batamat mangaji Amatlah, buhan muridlah, padahakan ka abah ikam masing-masing bakumpulan duit manukar lamang wan hintalu jaruk gasan badoa salamat,” ujar guru H Iriansyah.
“Inggih guru ai?” sahut kakanakan tadarau.

Sampai di rumah, si Amat bapadah ka urang tuhanya.”Malam isuk Bah ai, kami batamat mangaji disuruh guru, tapi ujar sidin bakumpulan duit sadikit saurang gasan manukar lamang,” ujar Amat ka abahnya.

“Nah, aliran apa pula ini ada urang batamat mangaji, maka sudah aku dangar urang batamat sambahyang,” ujar Palui bingung.

“Kalu kaya itu pian lakasi datangi abah tuan gurunya,” saran nang anak.

Lakas Palui datang ka masjid mandapati guru mangaji. ”Maaf, guru lah, cagar batamat mangajikah anak ulun?” takun Palui bagamat ka tuan guru.

“Bujur Lui ai? Malam isuk kami handak batamat, ikam handak manyumbang manukar lamangkah,” ujar sidin sambil lihum.

“Maaf guru lah, wayah ini ada urang batamat sambahyang, artinya kada sambahyang lagi, damintu jua batamat mangaji artinya kada mangaji lagikah malam isuknya,” ucap Palui pina bingung.

“Batamat mangaji ini maksudku Lui lah khataman Alquran, bila tuntung sa khatam, badoa salamat kita, biar makan lamang wan hintalu jaruk haja,kada apa-apa, nang panting kakanakan himung, besemangat inya mangaji Lui ai?” ujar guru mangisahakan.

“Oh, itukah maksud pian guru? Bagus banar, ulun pun handak jua umpat balajar mangaji mulai malam isuk, biar haja sudah tuha…,” ujar Palui kada tapi paham wan adat urang mangaji.

“Kena kita kumpulakan, nang tuha pada tuha,kakanakan khusus kakanakan mangajinya ya?” ujar sidin sambil lihum ka Palui.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.