Kisah Tahi Lala

sipalui-108Di pangkalan ujek takumpulan buhan Palui sapakawanan, hari maram banar pina gerimis sudah. Kebetulan ada Nenek Arsita lalu basapida tinjak baucap, ”Jaring-jaring Lui? Jaringnya nyaman banar nah, kada babau bila bakamih kena?”

“Singgah Nek, kalu buhannya handak makan jaring?” sahut Palui.

Basinggah Nenek Arsita, sakalinya batitiga manukar jaring.”Ulun manukar sepuluh bigi,” ujar Palui minta kautakan jaring.

“Ulun sapuluh bigi jua,” sahut Tulamak.

Sampai kamarian, bulik Palui ka rumah, bakamih di WC rumah nang hanyar diulahakan ulih tim sapu jamban di kampungnya. ”Napa abahnya Amat, babau hancing banar WC minum apa, pian?” takun bini Palui ka laki.

“Mama Amat ikam curigakah ka aku? Dijamin halal makanan atau minuman itu,” sahut Palui pina takajut diledek bininya.

“Minum apa pian,abah Amat? Pil Jin kah ini…,” takun bini Palui sakali lagi.

“Aku bukannya minum pil jin pang, tapi makan jaring,” ucap Palui asa supan ka bini.

Tuhuk bini Palui basiram WC wan pembersih, karana inya marasa bau hancing banar, batutup hidung bini Palui babarsih WC.

”jangan lagi lah, makan jaring, babau banar WC bakas pian bakamih. Lain kaya di jamban pang, kamih larut saurangannya,” nang bini pina sarik sambil bapapadah.

Kamarian ada bini Palui batamu Tulamak di pasar waktu inya batutukar bahan gasan baulah wadai ruti pisang. ”Tahukah bini Palui ikam?” ujar Tulamak marawa.

“Ada gosip apa, Mak. Pina mahingal mambawa habar,” jawab bini Palui asa takibar sumangat malihat Tulamak.

“Tahulah ikam bini Palui, laki ikam itu bapaku burit di warung Lala, wan tahinya dimakan Palui, nyaman banar ujarnya?” Tulamak mambari habar miring.

“Oh…?” asa siup nang bini mandangar. Lakas inya bulik ka rumah, didapatinya laki sedang asyik mambaca surat kabar kesayangan urang Banua.

“Abahnya Amat, napa pian kada tapi pintar lagikah damini,’ sarik langsung ka laki.

“Basabar umanya. Aku kada tahu soalnya nah, napa maka ikam, mahampasakan basa kaya itu ka aku,” Palui kada tarima jua.

“Pina rancak duduk di warung Lala, sampai tahi-tahinya dimakan? Dasar manusia kada pintar lagi, pian ini!” ucap bini Palui dasar sarik banar.

“Kaya itu nah aku jalasakan, aku makan jaring baisukan samalam, lalu supaya nyaman bacacap ka tahi lala, tahu ai kalu makan jaring, cacapannya tahi lala…,” Palui basuara penuh wibawa.

“Bujur abahnya Amatlah, samalam ulun basisiram WC bau hancing bakas pian makan jaring, kada nyaman makan jaring kalu kada bacacap ka tahi lala, dasar bujur ulun kada ingat banar nah,” nang bini hanyar ingat bahwa tahi lala itu cacapan gasan urang makan jaring.

“Han jarku nyaman kalu tahi lala itu? Lain tahi si Lala nang bawarung pisang guring itu umanya ai…,” Palui lihum malihat bini, ampih inya marangut. Lakasi ja masuk ka kamar, Palui manarik ka tangan bini, lihum nang bini ampih sarik.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.