Kisah Kada Babanyu

Ngaran banyak paninggalan, kada puluhan rapun nyiur haja, tapi ada jua paninggalan aruah abahnya babarapa rapun puhun hanau. Tiring-maniring, cangang-mancangangi si Palui ka puhun hanau nitu. ”Kawakah naya puhun hanau ne disadap?” Palui gagarunum saurangan di bawah puhunnya.

“Belampah apa Lui di bawah puhun hanau?” takun Garbus.

“Aku bapikir Bus ai, kawalah puhun hanauku ne disadap sudah,” sahut Palui.

“Aku malihat Lui lah, puhun hanau ampun Paman Marji nitu disadap sidin saurang, banyak mahasilakan gula habang sudah,” ujar Garbus.

“Dimana sidin Bus?” takun pula Palui.

“Di Hamawang Padang, datangi ja ikam, belakang panti asuhan, pasti tahu berataan wan sidin,” Garbus mambari saran.

Lakas Palui mandatangi Paman Marji nitu, karana hapal haja wadahnya maka pas betamuan wan sidin. ”Napa dibawa paman?” takun Palui, “Pian Paman Marji kalu?”

“Bujur banar ikam Palui, anak aruah haji nang bedagang minyak gas bahari iya kada?” tangguh sidin langsung.

“Iya banar paman ai, ulun handak minta lihatiakan puhun hanau,” ucap Palui.

“Di kampung mana?” takun sidin pula.

“Di Putat situ, kita lihati wayah ne paman lah?” ajak Palui.

Tulakan masing-masingnya basapida mutur ka Putat situ, sakitar 2 kilometer pada rumah Palui.
Sampai di tempat tujuan Palui malihati wan Paman Marji rapun puhun hanau nitu sabanyak 3 rapun.

“Umai Lui, kada biasa disadap lagi kalu?” tangguh sidin.

“Kada biasa lagi paman ai,” ujar Palui.

“Ayuja isuk baisukan aku cuba sadap katiga rapunnya,” ujar sidin.

Asa himung Palui. “Kaya apa ulun dapat jua kalu gula habangnya paman,” Palui pina kada parcaya wan sidin.

“Oh nitu jangan khawatir Lui ai, bila hanau ne disadap wan mahasilakan gula habang tentu haja ikam ada bagiannya jua,” sidin manahapi, lihum Palui.

Babarapa hari kemudian Palui kadada mandapati habar matan Paman Marji, padahal bajanji sidin cagar manyadap puhun hanaunya. Imbah sampai satangah bulan hanyar Palui ka kampung Putat mandapati rapun hanaunya.

”Nah, ada pina nakas urang manaiki hanau naya, itu nah ada paring bagantungan di puhun hanaunya,” ujar Palui dalam hati. Pas betamuan wan urang nang bagana parak rapun hanau Palui. “Aku betakunlah, hanau ne dinaiki urang kalu?”

“Inggih paman ai, ada nang manaiki sudah,” ujarnya.

Takijat Palui. “Han napa jarku, kada jujur Paman Marji naya?” Palui manyumpah dalam hati.

Babarapa hari kemudian Palui duduk di warung Acil Fatimah, malihat Palui wan Paman Marji datang matan pasar, sidin malihat jua.

”Lui aku minta maaflah, kada tahabari ka ikam, puhun hanau ikam ya katiganya kadada nang babanyunya, jadi kada mahasilakan apa-apa, kada jadi am aku mambari gula habang ka ikam,” ujar sidin lihum.

“Bah iyakah paman, katiganyakah kadada nang babanyunya? Masih anumkah hanaunya? Umailah paman,” Palui asa kada parcaya inya.

“Kita tuhaakankah dahulu hanaunya, tahun kena kalu babanyu lahangnya, jadi nyaman mahasilakan gula habang,” ujar sidin mambari saran.

Palui habang muha asa dibunguli sidin.

“Ayuja paman ai, kena ulun mancari panyadapan hanau nang lain haja,” Palui masam muha, bulik Paman Marji kada bapadah.

“Cari ha Lui ai?” ujar sidin asa muar jua ka Palui.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.