Kisah Kada Kawa Garing

palui-13Parlu kita pikirakan basama, surat kabar nang manjadi kebanggaan urang di banua kita ini, sampai ganal, takanal wan kawa batahan hidup adalah hasil parjuangan para pendiri, wartawan, karyawan, wan nang mamasang iklan wan nang manukar kuran. Tapi jangan kada ingat wan luper nang maantar hari-hari ka rumah palanggan.

”Barapa tahun Lui ikam jadi luper,” rawa Garbus ka Palui.

“Umurku wayah ini 45 tahun. Imbah tamat SMP umur 15 tahun, langsung haja jadi luper. Hitung haja barapa tahun,” ujar Palui pina tapaluh bakas baantar surat kabar ka rumah, kantur, sakulahan nang jadi palanggannya.

“Napa kulihan ikam salawas 30 tahun jadi luper,” Tulamak umpat batakun.

‘Sugih Mak ai, sugih Bus ai. Hidup nyaman, guring janak…,” Palui baagak.

“Tapi ikam kulihat basapida mutur buruk haja maantar surat kabar ya,” ujar Garbus.

“Maksudku sugih di sini, sugih hati buhannya ai. Biar basapida mutur buruk,tapi sapuluh tahun lalu sapida muturku ini manguyak di kartas. Mangaridit hasil keringat baantar surat kabar, lawas sudah lunas. Salain itu aku kawa jua manyakulahakan anak ka SMA, wan bila tangah hari sampai jam anam kamarian kawa turun maujek. Karana habis sudah baantar surat kabar,” sahut Palui mangesahakan nang sabujurnya.

“Salain suka, apa dukanya Lui jadi luper?” takun pula Garbus.

‘Dukanya aku kada kawa garing. Pernah aku garing baubat ke puskesmas, di rumah kusung kadada urangnya. Rumahku digandah banar ulih urang handak maambil surat kabar, sampai pacah kacanya. Makanya aku trauma banar, bila kada habis maantar surat kabar ka pelanggan kalu urang sarik,” ujar Palui bakesah sadih.

“Jadi intinya , gawian luper itu kada kawa garing, harus tatarusan sehat supaya tetap jalan tiap hari maantar surat kabar. Apalagi surat kabar urang banua ini hari Minggu terbit wan almanak habang terbit jua. Kada kawa kamana-mana lagi, biar pun tahun baru tatap maantar surat kabar iyakah Lui?” sahut Garbus paham gawian Palui.

“Banar Bus ai. Aku harus sehat tarus, maka anak ku kada hakun manggantiakan abahnya bila garing. Jadi sagaring-garingya aku bagamat maantar hingga sampai ka rumah pelanggan surat kabar,” sahut Palui, lihum Tulamak wan Garbus.

“Itu te ngarannya sugih hati, saurang gembira, urang gembira jua bila surat kabar datang sungsung ka rumah pelanggan, iya kah Lui?” ucap Tulamak.

“Iya Mak ai. Sugih hati haja aku ini…,” Palui lakas maantar surat kabar ka pelanggan nang masih tasisa, sebab urang pasti sudah mahadang di muka rumah masing-masing.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.