Kisah Kutang Bahambur

Limbah saruan di gunung buhan Palui sapakawalan singgah di warung Uwa Halidah sekadar ngobrol sambil minum kopi.

”Rami Lui lah kita saruan ka gunung , Utuh Hamawang anap Paman Gafar kawin, babini urang gunung, jadi ada jua kita baisi kaluarga di sana,” ucap Garbus ka Palui.

“Nang rami lagi kutang bahamburan di jalan, jadi asa galianan kalu tahayut?” sahut Palui.

“Umai Lui kutang bahambur bakas urang baapaan nitu?” Uwa Halidah baucap bingung sidin.

“Pian kada tahu kesahnya lagi uwa ai, bila tahu takajut tua?” Tulamak bisa baulah teka-teki ka uwa.

“Bila bajalanan ka daerah pagunungan kita siap-siap malihat kurang bahamburan di jalan iya kada buhannya,” Palui sambil tauling wan bagaru kapala, Uwa Halidah tanganga sidin kada parcaya.

Daripada bingung bakapanjangan labih baik Uwa Halidah ne batakun jua ka buhannya supaya jangan tasalah bawa habar kenanya bila ada urang duduk bapanderan di warung uwa.

”Apa Lui maksudnya kutang bahamburan te, BH biniankah?” takun sidinbanahap.

“Sama istilah artinya berbeda uwa ai, jangan salah paham pian kena ngalih?” Palui masih bungkam mamacahakan.

“Ayuha Lui ai, aku ja nang manjalasakan nah, maksudnya kutang itu te anjing di jalan ampah ka gunung nitu banyak bahamburan di jalanan, ada nang taguring, ada nang barabah-rabah inya, ada nang manyusui anaknya di pinggir jalan, jadi harus hati-hati supir bila ampah ka gunung situ kena ngalih kalu tarumpak kutang, kalu disuruh urang mangganti apa sulit urusannya. Pahamlah uwa maksud kutang bahambur nitu,” ujar Harbus manjalasakan.

“Oh damintukah Lui, Bus wan Tulamak, paham aku sudah makanya buhan ikam tadi lihum bapair hanyar masuk ka warungku, sakalinya cagar mangalahakan aku ya?” Uwa Halidah manumpalak ka buhannya.

“Iya sudah Palui wan Garbus,” ujar Tulamak indah disalahakan.

“Nah apa jarku Tulamak bahianat padahal inya nang baidabul mangalahakan pian uwa ai,” ujar Palui , lihum Uwa Halidah.

“Sama haja Lui ai batitiga buhan ikam nih?” mata Uwa mandelik.

“Jaka kita di banua ne uwa ai, kucing nang bahambur di pinggir jalan, makanya ada ibu pagawai nang tiap baisukan mambari makani kucing, jadi kucing mahadang inya wan sidin,” ucap Palui.

“Nah itu Lui ai nang kawa ditiru barbuat baik ka kucing?” sahut Uwa Halidah manutup pamanderan.

“Bujur Uwa ai?” Palui lakas bulikan wan bu­hannya.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.