Kisah Sapida Buruk

Mutiara dalam kahidupan itu kada musti intan wan barlian nang barkilau mangkilap haja pang. Tapi ada sasaurang nang panuh ketaatan tiada tanggal waktu salat bajamaah ka masjid maski basapida buruk matan rumahnya di desa Tuba ka masjid Al Huda di kampung Palui, tiap waktu salat, dalas baju silawar jutut bila hujan labat, mun ampih kada ka masjid.

“Siapa Lui sidin itu?” takun Garbus ka Palui.

“Aku kada tahu jua pang, cuma bila sampai waktu azan salat ada lewat di muka rumahku Bus ai sidin?’ sahut Palui.

“Nah kaya sidin nang parlu dicuntuh ulih kita barataan, jangan kuler, macam-macam alasan kada hakun ka masjid?” Tulamak umpat bapander.

“Hidayah itu larang haraganya Mak ai? Tapi taufik itu larang lagi pada hidayah,” Garbus bisa jua bapapadah.

“Maksud ikam apa Bus, urang dua laki binikah?” Palui bingung pamanderan kada fukus.

“Macam-macam haja Garbus ai ikam, kasihan kami kada tapi paham maksud ikam?” Tulamak manumpalak.

“Kada kaya itu buhannyalah? Aku tatap fukus jua pamanderan, maksudku biar parak rumah mun kada dapat hidayah dari Allah tatap urang itu kada mau salat ka masjid, jadi pang hidayah itu larang haraganya.

Damintu jua taufik, biar pun urang itu dapat hidayah tapi bila kuler mangarjakan salat masih balum dapat taufik lagi urang itu, maski hatinya sudah gembira mandangar urang azan di masjid misalnya? Makanya disamping gembira mandangar urang azan di masjid segera ka masjid jua malaksanakan salat bajamaah. Itu artinya urang nang dapat hidayah wan taufik dari Allah,” Garbus banahap manjalasakan. Maklum Garbus lawas jua duduk balajar agama di pesantren.

Karana panasaran si Palui inya mancari siapa sidin nang rajin lewat basapida buruk di halaman rumahnya.”Siapa Guru Rozi urang nang rajin basapida buruk ka masjid Al Huda ne?” takun Palui ka imam masjidnya.

“Itukah ngarannya M Rifani umurnya 42 tahun, gawiannya sakit jua maambil upah baulah batapres, bataku. Bila jam 12 sadang bamandak basiap-siap barangkat ka masjid, kaya itu jua satangah jam sabalum Asar , sudah basiap-siap jua inya barangkat ka masjid, maski basapida buruk hari-hari ka masjid, Dzuhur,Asar, Maghrib, Isya, Subuh kacuali garing hanyar absen datang ka masjid?” ujar Guru Rozi mautarakan ka Palui.

“Jauh banar wan ulun, Guru lah? Padahal gawian nyaman haja, bulik di sakulahan jam dua, salat Dzuhur bajamaah wan murid di musala sakulahan, jam satangah ampat saharusnya sudah tulak ka masjid, kaya itu jua Maghrib, Isya, Subuh, taranai haja sudah di rumah? Tapi apa, bahanu mangaruh di kalambu taguring,” Palui titikan banyu mata rasa supan malihat wan diri saurang haur dunia haja dikejar.

“kada kasudahannya ikam mun dunia haja nang dicari? Kada karasaan tuha kalu sudah, umur 45 tahun, masih hajakah ikam balangkambingan salat tarlalu am,” Guru Rozi manciling mamandangi Palui.

“Matan hari ne lah, ikam tandatangan pakta integritas di hadapanku wan di hadapan Allah SWT, bahwa aku akan salat bajamaah tatarusan jua kaya sidin, kaya apa akur hajakah?” Guru sarius banar.

“Nah kada akur lagi ulun Guru ai?” jawab Palui.

“Bila kada akur ikam masuk naraka ha kaya apa kada akur jua lah,” sidin blak-blakan.

“Astagfirullah, ulun tagasut baucap kaya itu. Ayuha ulun bajanji terima kasih Guru lah, mudahan ulun dapat hidayah wan taufik jua dari Allah, sahingga kawa kaya si mutiara dalam kahidupan hari-hari wan tiap waktu umpat salat bajamaah ka masjid,” Palui badoa.

“Amieen… “ujar Guru Rozi, takarinyum Palui.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.