Kisah Bakalayangan

Wayah hini amun kita batulakan matan Banjarmasin ampah ka Banjarbaru atawa sabaliknya, liwat di jalan sakitar bandara Syamsudin Noor, pas di hujung jalan nang dipisah dua ulih taman, ada urang bajual ‘kalayangan’ mudil sakarang. Bantuknya macam-macam, ada mudil Angri Bird, bantuk tuping bitmin, kalayangan dura-imun, pawar-rinjis, mudil garuda, upin-ipin, dll.

Kalu kita bahari bakalayangan bantuknya kunvinsiunal biasa haja, dan lagi rancak baulah saurang. Paring gasan tulang patiknya mambungkar bakas kandang hayam, bahan gasan budinya kartas minyak, limnya maulah dari galapung kanji. Amun pakai kartas putih, digambari awan kasumba.

Sabuting lagi. Wayah hini mun handak bakalayangan bagalas atawa batigangan, jua sudah ada dijual urang banang nang sudah bagalas. Jadi kada parlu bangalih-ngalih lagi manutuk papaci gasan manggalas banang.

“ Iya-ai.. bujur banar,” jar Garbus. “Aku bahari ..mun manggalas biasanya mamakai papaci ‘pucung listrik’ sagan ditutuk sabagai campuran sarbuk galasan. Marikitakannya ka banang awan lim ancur. Lapangan gasan manggalasnya di bawah barumahan ‘rumah panggung’ nang tinggi tungkatnya antara tanah wan lantai adapang mandua mitir,“ Garbus kaingatan wayah lagi kakanakan bahari.

Tulamak manyurung pandir, “Aku suah waktu manggalas, sudah salasai mambantang sabigian banang, tinggal mahadang karingnya haja lagi. Tiba-tiba ada hayam basasahan, hayam jagau manyasahi hayam bini nang bukah kada maingat diri. Pas inya marampak bantangan banang galasanku, napa ada ..banang galas an nitu pagat samunyaan, mucai sabanjaran!”

“Bahari tu jua masih kada pati banyak bangunan tinggi nangkaya ruku-ruku sakarang ini, jadi amun manaikakan kalayangan rilatif banyak ruang tarbuka. Mun wayah hini aur tahalang ruku haja,” ujar Tuhirang.

“Dasar bujur, Tuhirang-ai,” ujar Palui sambil tatawa. “ Kalu dahulu dairah kita ini tarkanal dangan galar ‘ Nagri Saribu Sungai ‘, wayah hini jadi ‘ Nagri Saribu Ruko wan Saribu Mutur Trak.”

Palui malanjutakan pandir, “Aku suah jua mangalami paristiwa bakalayangan nang tatap jadi kanangan sampai wayah ini.“

“ Ungkai kisahnya, Lui !”, sala Tuhirang.

“ Waktu itu aku bakalayangan batatapihan haja. Sakalinya ada kalayangan urang maniruki manantang batigangan. Bagitu banang kalayanganku sudah mulai bagisik awan banang musuh, aku ancap malumbar banang tunggal dikitan. Urang-urang nang manyaksiakan partigangan itu kuriakan mambari samangat, ‘Lumbari tarus bagamat, lumbar sambil diulai,’’ jar buhan bakuriak.

“Samantara simpulan tapihku nang lunggar mulai pina handak talului. Ancap aku manggulung simpulan tapih sambil tarus maulur banang. Karna kaasyikan batigangan kada bapagatan, tangan kanan maulur banang, tangan kiwa manggulung simpulan tapih. Kada karasaan sakalinya gulungan tapihku sudah habis tanaik, maka waktu itu aku pas kada basalawar dalam. Kajadian asyik maulur banang, ‘Si Utuh Antuy’ rupanya umpat jua bajinguk handak manyaksiakan urang bakalayangan. Untung haja pang waktu itu kadada bibinian “

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.