Kisah Maantar Surat

Urang rami di sakulahan guru-guru barsenda gurau, tapi dimapakah pula si Palui ne kada kaya urang lain, taungut inya kada banyak pander.

”Napa Lui maka taungut pulang kau?” rawa kapala sakulah.

Takijat Paluinya. “Kada apa-apa pak ai,” sahut Palui biasa haja.

“Kada mungkin Lui ai, aku lihat ungutan ikam nitu sarius,” sahut kepsek.

“Ungkai haja Lui ai, daripada dikuhup saurang,” timpal Garbus paman sakulahan.

“Ayuha nah aku ungkai Bus ai,” Palui manjawab.

“Lakasi ja Lui ai, kami handak tahu,” kepsek kada sabaran.

“Ulun ne titikan banyu mata pak ai, paman ulun nang asalnya kapala OPD (Organisasi Perangkat Daerah) wayah ne turun jabatan jadi tukang antar surat, nitu pang marganya,” Palui prihatin banar.

“Kasihan ya Lui,” sahut Garbus.

“Ya begitulah Lui ai, Bus ai, dahulu mamarintah sekarang diperintah urang pula, hidup ne bahanu di atas bahanu di bawah, aku gin isuk jadi apakah jua, bisa ampih jadi kepsek kada tahu nah lagi nasib?” kepsek mahibur Palui.

“Mudahan sabaran haja paman ulun nitu pak ai?” ujar Palui.

“Iya am Lui ai?” Garbus manambahi.

“Aku bapasan ka paman ikam Lui ai, kambaliakan haja segala sesuatunya kepada Allah Ta’ala,” kepsek mamadahi Palui.

Kamariannya Palui datang ka rumah pamannya. ”Napa paman pian ampihkah jadi pejabat eselon 2, wayah ne jadi pangantar surat bini ulun bakesah banar ka ulun parnah batamuan malihat pian maantar surat ujarnya,” Palui baadu-adu.

“Bujur Lui ai, aku wayah ne jadi pagawai staf biasa haja, urang manyabut pagawai fungsional, jadi kada baisi anak buah lagi, jadi apa-apa bila ada kegiatan aku maantar surat saurang ka dinas atau instansi lainnya,” ujar paman Palui bakesah.

“Pian kanapa jadi kaya nitu jabatan, ampihlah eselon 2, ampihlah bamutur dinas paman?” Palui kada puas.

“Maklum aku babini anum, bini tuha malapurakan ka atasan, jadi pang sampai ka talinga abah pimpinan daerah, makanya aku dicopot sidin jabatan eselon 2 nitu wan mutur dinas ditarik sidin jua,” sahut paman Palui sadih sakalinya.

“Ayuja basabar ai pamanlah, pas kana gilirannya di bawah, kaya apa bini wan anak pian nitu?” Palui batakun.

‘Aku barambangan wan bini tuha, anak tatap haja aku nang maungkusi inya kuliah badua baading di Banjar, wayah ne aku bakumpul bini anum di kampung Jambu Purut,” ujar sidin.

“Malukupi bini anum ai pamanlah pian?” sindir Palui.

“Iya begitulah Lui ai,” sidin lihum.

“Tapi aku ne jangan dituruti kena ngalih ikam, kalu bini tuha kada tahan bamadu bisa bunuh dirii inya kena?” papadah sidin.

“Inggih paman ai, ulun saikung gin cukup haja,” Palui takurihing.Sabuting pamanlah, kada kawa lagi am maminjam mutur dinas pian ka Pantai Asmara Tanah Laut sana.

“Ha…ha…” sidin tatawa.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.