Kisah Rumah Masa Depan

Damini nang ngaran gaya hidup, urang mancari rumah di kompleks perumahan elite atau paling kada di perumahan RSS artinya rumah sangat sederhana. Apalagi sudah baisi bini, baisi anak, parlu banar dipikirakan supaya kawa baisi rumah, jangan manumpang wan mintuha tarus.

Datang membentor si Palui, sakalinya mambawa batur wan nisan.

”Handak napa Lui, ikam mambawa naya, maandak ka kuburan aruah abah ikamkah?” takun Garbus.

‘Aku manyiapakan rumah masa depan Bus ai? Kalau urang lain manyiapakan rumah masa depan mancicil rumah di kompleks perumahan atau baulah rumah saurang, tapi kalau aku naya manukar batu wan nisan gasan aku mati kena kada ngalih lagi anak bini manukarnya,” sahut Palui panjang lebar.

“Bah iya pang, manusia langka ikam Lui ai? Urang rami mempermak rumah, atau baulah rumah, tapi ikam manyiapakan rumah masa depan,” sahut Tulamak jua.

“Aku sudah bahitung-hitung buhannya ai, umurku 46 tahun, sudah tuha nah, jadi pabila lagi basiap-siap baisi rumah masa depan ini?” sambat Palui kada kawa dipanglah kahandaknya.

Diandak Palui batur wan nisan nitu di halaman rumahnya, maka sudah minta tulisakan wan tukang jual nisan: telah meninggal dunia si Palui bin Fulan, tanggal titik-titik pang lagi?

“Napa abahnya pian pina marista banar diri?” takun nang bini.

“Kada ai, aku kaganangan banar wan kula kita almarhun Hidayat, sidin imbah datang maambili anak nang sakulah di pesantren, sudah nitu sebentar barabah-rabahan di ruang tamu sambil malihat tv, sampai salat Dzuhur , imbah bawudu rabah di dalam kamar, kada sing suaraan lagi, dibawa ka rumah sakit Hasan Basry, masuk ruangan UGD, jar dukter urangnya sudah maninggal dunia,” Palui asa pucat kaganangan nitu.

“Jadi pian kaganangan taruskah wan almarhum Hidayat?” takun nang bini lagi.

“Bararasa umanya ai, supaya jangan kalumpanan lagi wan mati, makanya kusiapakan sudah batur wan nisan ini nah?” Palui pina sarik ka bini. Nyaman lakas jua ikam mancari laki lain iyakah? Palui tasinggung berat. Tadiam nang bini, imbah nitu baucap maminta maaf ka laki.

”Ulun minta maaf abahnyalah, kalu pian tasinggung, nang bujur mudahan lakas insaf pian, nitu maksud ulun te?” kilah nang bini.

“Ayuha kumaafkan, aku didoakan umanya ai, mudahan insaf tarus, kematian sudah parak menjemputku, nyaman ikam lakas balaki ka lain,” Palui manyindir pula inya sakali baucap ka bininya.

“Ampih am abahnya ai nah, ulun bapander, kena behualan tarus,” nang bini maninggalakan, taungut Palui mancilingi batur wan nisannya nitu.

Han jarku, panyinggungan wayah ne, salawas marasa handak mati Lui lah ikam? Saharusnya te baik-baik bapander ka bini, apa kahadaknya ditulusakan, tampulu ikam masih hidup berumah tangga wan inya, jangan panyarikan ya? Cilingi ha batur wan nisan nitu, kalau parlu bawa tarus kamana ikam pergi Lui ai? Palui gagarunum dalam hati.

Banyaki Lui ai, baisi amal saleh, hanyar ikam mati.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.