Kisah Dijamak Jibril

Hidup manusia nitu penuh rahasia , kita kada tahu nasibnya pacangan kaya apa kena, ngalih manangguh. Dahulu sakit banar urang nitu, wayah ne nyaman, dua talu kali umrah, naik haji sudah. Sabaliknya dahulu sugih wayah ne marana , karana ditinggal mati kuitan, bausaha kada bisa, tahu minta duit wan kuitan haja, pas kuitan matian, inya dibunguli urang bausaha, habis hartanya.

”Napa Lui ada baisi kesahkah pulang ikam?” rawa Garbus.

“Ne kesah atau parjalanan hidup manusia Bus ai, ngalih ditangguh. Pasalnya dahulu sakit wayah ne hidup nyaman sudah nah,” ujar Palui.

“Nitu jar urang bahari dijamak Jibril Lui ai.” sahut Tulamak.

“Iyakah Mak?” Palui takajut,” ujar Tulamak.

“Jangan ha marimihakan urang lain nang susah samantang saurang sugih,” sambung Tulamak.

“Dasar bujur Mak ai, jangan kita tapakai pangrasa, asa panyugihnya, asa pamintarnya, asa paalimnya, asa panjagaunya, karana sawaktu-waktu bisa haja diambil Tuhan, kada bedaya apa-apa jadinya,” Palui mambujurakan panderan Tulamak.

“Kesah dijamak Jibril tadi adakah nang lain pulang Lui?” takun Garbus lagi.

“Ada ai nah, dahulu inya ne kada bisa banar manulis jar urang wayah ne mangarang , tapi karana rajin latihan, barakat kaji diulang akhirnya lancar, bisa banar inya mangarang cerpen, novel atau artikel , hingga akhirnya tambus tulisannya ka salah satu media cetak nasional. Sabalumnya guru-gurunya saurang nang mahina wan tulisannya, tapi wayah ne mamuji banar, karana rancak ditraktirnya makan bakso, dari hunur tulisannya, wan inya rancak jua ka Banjar atau ka Jakarta manarima hadiah lumba panulisan, nitu bujurlah Mak dijamak Jibril?” Palui minta pandapat.

“Bujur banar Lui ai, kesah ikam nitu,” sahut Tulamak.

“Han apa jarku, dahulu dirimihakan ulih urang-urang wayah ne dipuji urang inya, satumat ha kalau Allah manghandaki sesuatu wan sasaurang nitu, kita kada kawa mamanglah, iyakah?” Palui lancar.

“Iya banar Lui ai,” sahut Garbus.

Rami takumpulan bapanderan, mancari hikmah dalam kahidupan buhannya naya. Siapa tahu buhannya nitu nang betalu ada nang dijamak Jibril jua.

“Mudahan aku dijamak Jibril jua Lui ai?” Tulamak pina marista.

“Aku gin jua Mak ai, handak jua dijamak Jibril, jaka kawa?” Palui manambahi.

“Iya berataan manusia pasti handak dijamak Jibril, jakanya kawa?” sahut Garbus.

Rami takumpulan ada nang bakiyauan ka buhannya.

”Aku handak besaruan maulid Palui ai, Garbus wan Tulamak, damini jua, kita mambaca syair Barjanzi,” ajak Pak Haji Thalib.

“Nah napa Mak, Bus, kada dijamak Jibrilkah kita betalu naya?” ujar Palui.

“Tamasuk nang dijamak Jibril jua kita naya,” sambat Tulamak.

“Tapi sabuting, aku kada bisa mambaca syair Barjanzi?” Garbus masam muha.

“Han jarku Bus, makanya balajar ya?” Palui tatawa.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.