Kisah Lain-Lain Tampatnya

Di langgar parak rumah Palui nitu kalu kisukan pupukul sambilan-sapuluh, atawa puhun kamarian imbah sambahyang Asar, biasanya ada babarapa urang Kai (5-6 urang) dudukan sambil mangatik-ngatik tasbih atawa babacaan sambil jua pina takantuk-kantuk.

Asalnya, Palui kada paham malihat kaadaan nitu, tapi akhirnya Palui mangarti jua. Sabab langgar Palui nitu biasanya dipakai urang di wilayah kampung situ sabagai tampat nang satratigis gasan manyambahyangakan janazah atawa sambahyang fardhu kifayah kalu ada urang maninggal dunia. Nah, para Kai nang dudukan di langgar nitu, sambil ba-I’tikaf, sambil mangatik-ngatik tasbih atawa mangaji, gagawaian jua manjaga luku ada urang malaksanakan sambahyang fardhu kifayah. Artinya bulih dibilang sambil manyalam nginum banyu ! Sabab biasanya mun umpat sambahyang janazah nitu, sidin-sidin taumpat jua sawabnya dapat amplup.

“Tapi nitu kada tasalah kalu, Lui-lah ?” takun Garbus wan Palui.

“ I-ih ..Kadada pang urang manyalahakan, Bus-ai. Mudah-mudahan sual dapat amplup nitu kada manjadi tujuan utama, sabab napa-napa tu samuaan tagantung awan niat kita jua,” jar Palui bijaksana.

“Artinya.., kalau pun niatnya supaya dapat amplup jua .., yahh.. hasilnya nang nyata inggan dapat amplup nitu pang sudah. Sual pahalanya … Wallahu a’lamu bissawab !” ujar Garbus mamarnum pandiran Palui.

“ Suah nang aku asa takurihing di hati,” jar palui pulang, ”Puhun kamarian itu imbah tuntung sambahyang Asar, babarapa urang Kai dudukan basandar ka dinding langgar, mata sambil bapajam-pajam mangatik tasbih, tiba-tiba datang cucu salah saurang diantara Kai nitu, umurnya kira-kira 5 atau 6 tahun, inya mamaraki kainya sambil manating tangan baucap minta duit. Sakalinya nang Kai sarik sambil baucap kaalah cucu sidin nitu : ‘Kai kadada duit ! Cakadanya urang mati hari-hari pang, Tuh-ai !”. Tarnyata sampai puhun kamarian itu mimang balum ada urang sambahyang fardhu kifayah di langgar nitu. Jadinya Si Kai baluman ada jua dapat amplup.

“ Tapi, Lui-ai. Aku asa salut banar awan urang di kampung subalah nang mambiasaakan kada ba-a-amplupan mun malaksanakan sambahyang fardhu kifayah. Mintu jua diparlakukan tarhadap khatib jumat, kadada baaamplupan jua,” ujar Tuhalus basumangat mahabarakan.

“Napa alasannya maka nangkaya itu, Tuhalus ?” takun Tulamak.

“Sabab buhannya maanggap sual sambahyang janazah, atawa manjadi khatib Jum’at nitu manyangkut urusan ‘lillahi taala. Marika bapandapat kalu kadua urusan nitu diamplupi, dikhawatirakan ‘lillahi ta’ala-nya’ bisa tagangggu kaina !” ujar Tuhalus manjalasakan.

“I-ih bagus jua pang kabiasaan nangkaya itu dimasyarakatkan. Di satu sisi mun wayah urang kamatian, jadinya kada parlu dibabani lagi harus manyiapakan amplup sagala macam. Baik mun kaluwarga nang maninggal nitu urangnya mampu. Mun takana urang nang kada mampu, kaya apa ?” Tulamak manyurung rasa impatinya.

“ Tapi di sisi lain pulang, nangkaya gasan khatib Jumat nitu, kurasa amun dibari amplup nitu asa wajar-wajar haja. Yah.. sabagai kita manghargai ilmu sidin, sakadar pangganti uang binsin, mahargai pangalih sidin mangarang batangah malaman. Inya masigit ada haja jua duitnya !” ujar Palui mambijaksanai. “Awan pulang, sual ‘lillahi ta’ala’ nitu sabanarnya lain-lain tampatnya, buhannya-ai. Lillahi ta’ala itu andaknya di hati, kalu amplup tampatnya di kantung,” sambil lihum Palui parmisi bulik badahulu.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.