Kisah Tapalisit

Palui mambawai buhannya ( Tuhirang, Tuhalus wan Garbus ) mailangi Tulamak nang tahabar garing.

“Napa garang nang diarit Tulamak maka sampai kada kawa bajalan ?” takun Garbus.

“Ujar nang bini waktu batamuan wan biniku di pasar, Tulamak tapalisit rabah di kamar mandi batisnya bangkak, kikira tasilahu kalu,” jar Palui manjalasakan.

“Tapi mun sakadar tapalisit haja mustinya kada sampai bangkak kada kawa bajalan kaya itu. Pangrasaku barhubung awaknya lamak, jadi amun gugur bisa-bisa ada tulang nang ratak, makanya batisnya bangkak,” Tuhalus mangira-ngira.

“Amunnya tasilahu atawa ada tulang nang patah-kah, kaina kita bawa ka paurutan nang harat. Aku tahu wadahnya,” ujar Tuhirang.

“Ayuha kita ka sana haja dahulu, kaina kita lihat kaadaannya. Amun handak diurut kita bawa ka paurutan nang ujar Tuhirang nitu, amun parlu ka duktur kita bawa ka duktur,” ujar Palui wan buhannya.

Satiba di rumah Tulamak, dasar bujur kaadaan Tulamak mambari maras banar. Inya baduduk basandar bantal di kaguringan, muhanya pucat kalas, batis kiwanya nang bangkak bahunjuran.

“Kaya apa rasanya batis ikam nang bangkak ini, Mak ?” takun Palui.

“Liwar sakitnya, Lui-ai. Kada kawa tagarak sadikit sakitnya marinyut sampai ka bumbunan !” jar Tulamak takuringis.

“Kalu kami cariakan paurutan, hakunlah ikam diurut, Mak ?!” takun Tuhirang.

“Aduuhh.., kada usah dahulu Tuhirang-ai. Rasanya aku kada kuat manahan. Jangankan diurut tagatuk sadikit haja sakitnya kada takira,” jar Tulamak manulak.

“Tapi Mak-ai, amun dibiarakan kaya ini haja kaina bisa batambah bangkaknya,” jar buhannya.

“Biar samantara dikasai awan ‘parutan jahi’ haja dahulu. Biniku tadi sudah manukar jahinya,” jar Tulamak pulang.

Karna Tulamak kada hakun diurut, akhirnya Palui wan buhannya sapakat mambawaakan duktur gasan mamariksa kaadaan Tulamak di rumahnya. Isuknya mutur ambulan ngiung-ngiung mambawa Tulamak gasan dirunsin di rumah sakit. Hasilnya tarnyata mimang ada tulang landau Tulamak nang patah dan harus diuprasi kamudian disambung atawa dipasangi pen. Manurut duktur amun dikasai awan ubat luar haja, atawa diurut, untuk tasambung kambali tulang nang patah nitu, kamungkinannya kacil banar mangingat usia Tulamak nang sudah labih lima puluh.

“Amun ulun diuprasi, makan bapamantang-lah, Duk ?” takun Tulamak ( Inya takutan kalau pina makan bapamantang atawa babatas, sualnya harap maklum inya makan gancang. Amun wayah saruan urusan dua piring bilang kada bahayut !).

“Sabanarnya makan kada bapamantang pang, Pa-ai,” jar duktur. “Tapi saran saya sabaiknya makan dibatasi supaya barat badan kawa dikurangi, jangan talalu lamak kaya ini”.

Palui nang badiri di higa duktur umpat jua maingati Tulamak, “Jangan makan nang karas-karas wan nang panas-panas, nangkaya wasi, batu wan bara api, Mak-ai !” jar Palui sambil lihum.

“Ikam makan kada bulih ‘gancang’, Mak-ai, kaina bisa bapacahan piring !!” Garbus manimpali.

Duktur tatawa, Tulamak pina masam muha. Inya asa garigitan awan Palui wan Garbus.

Satalah buhan Palui barunding wan bini Tulamak sarta kaluwarga nang lain,akhirnya diputusakan jadi jua diuprasi. Duktur sapasialis anastisi mausulakan dangan cara ‘bius lukal’ haja, artinya nang dibius itu hanya di sakitar bagian nang diuprasi haja, sahingga si pasien tatap dalam kaadaan sadar. Tapi Tulamak bakaras minta supaya ‘dibius tutal’ haja, sualnya inya takutan kalu mandangar atawa malihat duktur mambungkar batisnya.

Katika duktur anastisi handak malakuakan pambiusan tiba-tiba Tulamak baucap; “Hadang dulu satumat, Duk”, jarnya. Duktur takajut, “Ada apa, Pak ?”

“Tulung ambilakan dumpitku di kantung balakang salawarku nang bagantung nitu,” ujar Tulamak sambil manunjuk ka arah salawarnya nang bagantung di paku.

“U-uu .. urusan bayarannya nanti saja Pa-ai satalah Pian handak kaluar rumah sakit,” ujar duktur.

“ Kadapapa duktur-ai, (ujar Tulamak), Ulun handak mangatahui barapa duit nang ada di dumpit nitu. Sakadar bajaga-jaga haja, Duk-ai. Sualnya amun sudah dibius ulun kada tahu napa-napa lagi!”

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.