Kisah Baju Salawar Lawas

sipalui-96Bulan puasa jangan dianggap barat, walaupun sabujurnya tarasa saban hari parut kimpis, lapar wan haus-hausnya. Sual lapar itu tagantung wan kita haja maatasinya karna nang pasti kita kada bulih kurang makan wan tatap cukup vitamin.

“Sabujurnya kita makan wan nginum tatap haja kaya hari-hari biasa, hanya mamindah waktu makannya. Makan siang atawa sarapan kita majuakan ka subuh gasan makan sahur wan makan malam kita majuakan ka magrib tamasuk nginum wan makan wadainya, ujar Palui.

“Pas banar hitungan ikam itu Lui ai, tapi aku sudah kabiasaan makan kada bawaktu bisa baisukan, tangah hari, kamarian atawa tangah malam,” sahut Garbus.

“Kalu kaya itu parut ikam sama wan parutnya si Tulamak kada babantuk lagi, kaya parut sapi nang makan rumput,” ujar Palui.

“Hau…… hau….. kanapa maka bubuhan ikam manyindir aku?” ujar Tulamak nang hanyar datang.

“Kami mamander ikam karna ikam sihat walafiat haja walaupun puasa kada makan sahur karna kasiangan,” ujar Palui maambung.

“Tarima kasih aku diambung,” ujar Tulamak himung.

“Tapi kanapa maka salawas bulan puasa ini ikam malah pina makin balamak? Kalu aku wan Palui salawas bulan puasa ini malah balunggar salawar,” ujar Garbus managur Tulamak.

“Awakku tatap haja kaya biasa, buktinya aku batimbang tatap 80 kilu” sahut Tulamak.

“Kada mungkin 80 kilu, tangguhanku paling kada 95 kilu,” ujar Palui manyindir.

“Mungkin karna makanan nang kumakan babarakat jadi aku balamak,” ujar Tulamak kada hakun kalah.

“Babarakat haja karna ikam makannya tangah hari di warung sakadup,” balas Palui.

“Aku wani basumpah,” ujar Tulamak.

“Salawas puasa ini aku kada biasa pacah karna aku sadar puasa ini pahalanya gasan aku jua.”

“Tapi kanapa maka kulihat samunyaan baju salawar nang ikam pakai bulan puasa ini pina sasak kantat kada kawa dikimai,” ujar Garbus.

“Kabalujuran samunyaan baju salawar nang kupakai bulan puasa ini adalah baju lawas wayah aku masih kurus,” sahut Garbus.

“Ooooo… aku paham Mak ai. Artinya ikam mahimat mamalar baju salawar nang ada, baju salawar nang lawas karna haraga kain wayahini salangit kada sanggup lagi manukar. Karna baju lawas, baju halus maka kalihatan bujal ikam malining kaya bigi kalangkala,” ujar Palui manyindir Tulamak.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.