Kisah Daun Anum

Ngaran umur 40-an, jar urang dalam ilmu jiwa manusia nitu ada istilah puber kadua. Ini bisa bahaya mun kada kawa mangandalikan, barabe jadinya alias berantakan rumah tangga.

”Wayah ni aku hiran jua Bus ai, lakiku jarnya katuju daun anum, makan kada tapi hakun lagi di rumah,” ujar bini Palui ka Garbus.

“Maklum salawas jadi guru honor ni, laki ikam sibuk di sakulahan, tigaparampat hari bagana di sakulahan haja, maklum full day school kalu? Apa te inya kada makan siang di rumah,” sahut Garbus.


“Bila ka rumah sambatannya daun anum tarus, napa maksudnya Bus?” takun bini Palui.“Aku rasa ikam harus pintar, manyiapakan menu laki, gangan nang ada daun anum, pucuk kastila nang anum, pucuk gumbili nang anum, jangan daun nang tuha-tuha dijarang, pahit banar!” sambat Garbus sambil lihum.“Ayuha kena ai aku cubai daun nang saraba anum,” ucap bini Palui.Sampai di rumah , bini Palui manyiapakan gangan gasan dimakan laki daun nang saraba anum .”Nah abahnya ulun sajiakan gangan nang daunnya saraba anum, pucuk gumbili, pucuk kastila nang anum, manukar ayam nang anum, saraba anum ai ulun sajiakan, supaya lahap pian makan,” ujar bini Palui ka lakinya.

“Aku rasa kanyang lagi umanya ai?” sahut Palui.

“Pian katuju daun anum kalu?” takun nang bini asa kesal ka laki.

“Iya bujur katuju daun anum, tapi nang kumaksud daun anum ni, ngaran rumah makan umanya ai, ngarannya daun anum di situ banyak makanan nang nyaman-nyaman tapi murah, biniannya nang tukang surungi anum-anum jua, dua belas ribu saporsi kanyang banar, jadi maaf nah aku rancak makan di daun anum,” Palui asa manang ka bini.

“Jadi kada handak lagi makan di rumahkah?” sahut nang bini ketus.

“Kada kaya nitu pang, pas takana handak banyaman-nyaman banar ai, rasa muyak sudah, haur pucuk gumbili, pucuk kastila nang dijarang nitu-nitu haja menunya,’ sambat Palui.

“Ayuha mulai isuk ulun kada handak lagi bamasak wan maulah gangan ya?” nang bini putus asa. mandam haja Palui.

Sakalinya pas isuk tangah hari, Palui lakas datang ka rumah.”Mana umanya nasi wan iwak, adalah ikam bamasak?” takun Palui.

“Nah sudah bajanji kalu samalam, ulun kada handak bamasak lagi, makanya kita bekaringan haja hari ini,” ujar nang bini tenang haja.

“Bah iya pang, balapar am aku hari ini, maklum aku kada tapi ada jua duitnya duduk di warung daun anum,” ucap Palaui masam muha.

“Lakasi ha ka warung daun anum pian, kada usah lagi ya makan di rumah?” nang bini manumpalak.

“Uh umanya sabar nah, duitnya kadada jua makan ka situ, jadi aku minta maaf banar atas kalakuan salama ni mangacewakan ikam umanya ai, nyaman makan di rumah jua, kawa sambil babaju kaliwang wan basilawar handap, biar ha makan pucuk-pucukan, asal jangan pucuk masjid haja ikam jarang,’ ujar Palui asa manyasal inya.

“Ayuha nah ulun bamasak wan mangangan bastikkah nah, ampih pucuk-mamucuk, hadangi ja pian sampai sajam, imbah nitu makan kita baimbai, “ nang bini ampih sarik.

“Tarimakasih banar aku umanya ai, ikam ampih sarik ka laki,” Palui asa himung wan bini.

Iya sudah dua laki bini naya.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.