Kisah Batangsa Kompor

Bilang samingguan ini nang bini batangsa minta tukarakan kompor lawan Palui. Rupanya inya malihat urang di sabalah manyabalah rumah bilang kadada lagi nang mamakai dapur.

“Biar ai pahadangan mamakai dapur haja dahulu,” ujar palui mamanderi bininya.

“Anu abahnya ai ulun muyak sudah haur kapalakan tarus, lawan amun bakompor tu ujar urang lakas masaknya. Lawan jua amun badapur tarus wayah apa majunya abahnya?” ujar bini Palui baulah alasan.

Mandangar bininya bilang kasasahangan banar handak bakompor kaya urang, ahirnya Palui hakun jua manukarakan kompor.

“Baiknya batakun dahulu umanya ai lawan bininya tuhirang nangkaya apa caranya malikit kompor tu,” ujar Palui mamadahi.

“Sutil haja abahnya ai, bakompor ini paling nyaman malikitnya, satumat jadi apinya,” ujar bini Palui

“Ayu ai kalu kaya itu, tolong gorengakan ai iwak papuyu kulihan maunjunku samalam. Jangan kada ingat sambal acannya,” ujar Palui.

Siangnya Palui takipik wayah mambuka tatudung malihat iwak papuyu kulihannya maunjun bilang kada sampuraka bantuknya, pina hirang lutung wan babau hangit.

“Umanyaaa!… Kanapa iwaknya maka hirang?” ujar Palui kukuciak.

“Anu… ampun maap abahnya ai, iwaknya kahangitan,” ujar nang bini marasa basalah.

“Pasti ikam kanyarakan manyalaakan api kompornya,” ujar Palui curiga.

“Kada abahnya ai, apinya nangkaya biasa jua, nangkaya bamasak di dapur jua,” ujar bini Palui kada hakun disalahakan.

“Nangkaya bamasak di dapur kah umanya?” ujar Palui pulang.

“Inggih, nangkaya ulun bamasak didapur tu pang, apinya habang,” sahut bininya.

“Han bujur kalu, ikam itu tasalah umanya ai. Api nang bagus itu sabujurnya api nang biru nangkaya dikompor itu. Lakas masak tapi kada maulah hangit,” ujar Palui bagaru kapala.

“Ooo.. kaya itu kah abahnya, sangkan ulun api nang biru itu lambat masaknya makanya tadi ulun nyaraki sampai habang nangkaya badapur,” ujar bininya hanyar paham.

“Alhamdulillah kalu ikam sudah paham umanya ai, makanya kada salah kalu ikam tadi kusuruh batakun-takun wan urang nang sudah biasa bakompor kalu?” ujar Palui mamadahi.

“hihihi.. inggih.. bujur banar ujar pian,” ujar nang bini supan-supan.

“Ayu ja kada apa-apa umanya ai, kalu kaya itu kada parnah balajar,” ujar Palui pulang. “Kalu kaya itu tolong gorengakan intalu haja gin, parutku sudah galurukan banar,” ujar Palui manyuruh bininya.

“Anu… anu abahnya ai nasinya hangit jua,” ujar nang bini pina kada nyaman. Langsung masam muha Palui imbah mandangar nasinya hangit kada kawa dimakan jua.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.