Kisah Tapilih Bangkung

Palui wan kakawalannya dahulu biasa baulah parsatuan ngarannya PARGUM alias Parsatuan Guring Malandau dan wayah handak puasaan ini bubuhannya baulah pulang tim SAR alias tim SARuan. Maklumlah bubuhannya ini tamasuk lulusan UGM alias Urang Gancang Makan.

Wayah bubuhannya asik bakesahan di warung acil Isul, datang Tuhirang bahabar bahwa malam kaina imbah Isya Pak Haji Duraup basalamatan. “Ujar sidin datang hajalah biar kada disaru,” ucap Tuhirang.

Imbah tuntung babacaan doa salamat langsung basusurung maka bubuhannya umpat jua manggani-i.

“Malam ini aku cucuk banar makanannya karih kambing karna sudah lawas kada tamakan maklumlah haraganya larang banar,” ujar Palui babisik sambil umpat manyurung piring.

“Ayu Lui, lakasi manyurung jangan pina lambat supaya kita lakas jua mamakaninya,” ujar Garbus karna Garbus malihat si Palui pina maitihi banar tiap piring nang disurungnya.

“Aku kada manahan piringnya tapi mancium baunya mangit banar,” ujar Palui sambil manyintak manarik kahiga awaknya piring nang baisi hirisannya pina batungkah ganal.

“Kalu samunyaan sudah dapat, silakan haja makani,” ujar Pak Haji Duraup manyuruh tamu-tamunya.

“Hibaki mangaut nasinya,” ujar Garbus manyuruh Palui, lalu Palui langsung maraup nasi jubung banar ujar paribahasa talindung kucing duduk.

Wayah nang lainnya bahimat makan, si Palui pina lambat banar kiyul-kiyul mamamah nasi sambil mangguliming tulang, malah wayah urang tuntungan si Palui hanya kawa mamakan saparunya lalu langsung babasuh tangan.

“Lui,” ujar Garbus,”Kanapa maka kada dihabisakan, mubazir, apalagi tadi ikam baucap bahwa masakan karih kambing ini tamasuk kasukaan ikam, apakah ikam sakit gigi.”

“Mungkin Palui katulangan,” ujar Tuhirang mahuhulut.

“Sabujurnya karih kambing ini kasukaanku tapi tadi aku kana sialnya,” ujar Palui.

“Sial napa ujar bubuhannya. Makanya ikam tadi paling pandahuluan mamilih piring nang taganal hirisannya,” ujar Garbus.

“Kukira nang pangganalnya hirisannya tadi adalah tulang pahanya jadi pasti tabanyak dagingnya, nyatanya……. nyatanya aku sial……,” ujar Palui.

“Sial napa Lui?” ujar Garbus.

“Sakalinya nang kupulih tadi lain paha kambing tapi adalah hirisan bungkah laos saling ganalan gasan manyamani karihnya,” ujar Palui kakalahan.

“Makanya jadi manusia itu jangan talalu rakus,” ujar Garbus maniwas Palui.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.