Kisah Umpat Mancalon

Palui-05Parak pamilu kaya wayahini, Palui takuling kapala melihat jalanan di kampungnya nang mahibak lawan atribut partai. Nang maulah inya kada habis pikir saikung kawal sarantang-saruntungnya, Garbus, maka umpat jua bacalon.

“Lihati gambarnya ngitu, imbahanu maras imbahanu muar jua malihat. Untung dipasang di muka rumahnya sorang, jaka di muka TK tu kira-kira banyak kananakan nang kapidaraan gara-gara talihati gambar Garbus ngitu,” ucap Palui menyambati.

“Hi-ih. Tumatan bahari kada pernah umpat di partai, pas pemilu ngini timbul umpat bacalon. SMA haja sampai lima tahun hanyar tamat. Jaka tarusakan bahuma aja ada jua kolehan,” ujar Tulamak manambahi.

Kada lawas bapandiran tang cungul ha Garbus di warung Acil Isul wadah buhan Palui dudukan saban malam tu.

“Ham panjang umur timpakul ngini. Hanyar dipandir cangul urangnya,” ujar Tulamak.

“Selamat malam semuanya,” ujar Garbus sambil malambai tangan.

“Cil Ulahakan kupi susu. Pakai cangkir halus aja,” ujar Garbus lawan suara nang diulah-ulah model kaya pajabat.

“Muha nyawa Bus ai. Model pajabat bujuran aja sudah. Kutawak lawan sepatu ladung ngini jua ne,” ujar Palui garigitan.

Malihat ngitu Tulamak sigap meragap manyabari Palui.

“Lui, Mak, aku ka sini ni handak minta tolong nah. pamilu kaina tolong buhan ikam sarumahan mamilih aku lah,” pinta Garbus.

“Akur haja, tapi aku handak tahu dahulu apa garang nang maulah ikam umpat mancalonakan diri,” ujar Palui.

“Ikam kada membaca kah tulisan di gambar ku tu. Handak mambangun Banua. Kuusahakan labih baik lagi bila aku jadi angguta DPR kaina,” ujar Garbus.

“Cah buhung. Pahumaan habis tasanda sudah gasan modal jadi angguta DPR,” ujar Tulamak umpat manumpalak.

Imbah katuhukan disambati kakawalannya tu akhirnya kada tahan jua Garbus. Lalu baucap ai inya.

“Iih. Ada pang niat ku nang lain,” ucap Garbus lamah. Pina mambari maras.

“Aku tu handak marasai jua kaya pajabat nang baduit.

Satumat-satumat bajalanan ka Jawa, ka Sumatera, sampai ka luar nageri. Tumatan bahari aku kada bisa bajalanan jauh, haur di kampung aja kaya iwak dalam kulam, karuh ha pulang banyunya,” ujar Garbus makin mambari maras.

“Ham kalu, sudah aku duga pasti ada niat lain si suanang ini. Kada ku parlu!” ujar Palui sarik.

“Uma ai purunnya,” ucap Garbus pulang.

“Kada!” ujar Palui lawan Tulamak tapaimbai.

“Sakali kada tetap kada. Hidup kada!” ujar Tulamak sambil tatawa mengalakak.

“Acil Isul…” ujar Garbus minta tolong lawan Acil Isul.

“Aku kada umpatan. Aku handak tutup!” ujar acil bakuciak.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.